'ಲಿಬ್ರಾ' ಎಂಬ ತನ್ನದೇ ಹೊಸ ಕರೆನ್ಸಿ ಘೋಷಿಸಿದ 'ಫೇಸ್‌ಬುಕ್'!

ಏನಿದು ಫೇಸ್‌ಬುಕ್ ಲಿಬ್ರಾ ಕರೆನ್ಸಿ?

ಮೊದಲೇ ಹೇಳಿದಂತೆ ಲಿಬ್ರಾ ಕರೆನ್ಸಿಯು ಬಿಟ್‌ಕಾಯಿನ್ ರೀತಿಯದ್ದೇ ಆದ ಒಂದು ಡಿಜಿಟಲ್ ಕರೆನ್ಸಿಯಾಗಿದೆ. ಇದನ್ನು ಫೇಸ್‌ಬುಕ್ ನಿರ್ವಹಣೆ ಮಾಡಲಿದ್ದು, ಜಗತ್ತಿನಾದ್ಯಂತ ಸುಲಭವಾಗಿ ಆನ್‌ಲೈನ್ ಹಣ ವ್ಯವಹಾರ ನಡೆಸಲು ಸಹಾಯವಾಗುವ ನಿಟ್ಟಿನಲ್ಲಿ ಲಿಬ್ರಾ ಹುಟ್ಟುತ್ತಿದೆ. ಜಾಗತಿಕ ಬಳಕೆದಾರರನ್ನು ಹೊಂದಿರುವ ಫೇಸ್‌ಬುಕ್‌ ಇದನ್ನು ಉಪಯೋಗಿಸಿಕೊಳ್ಳಲು ಮುಂದಾಗಿದೆ.

ಲಿಬ್ರಾ ಕರೆನ್ಸಿ ಉಪಯೋಗ ಏನು?

ಪ್ರಸ್ತುತ ಜಾಗತಿಕ ಹಣಕಾಸು ವರ್ಗಾವಣೆ ವಹಿವಾಟು ನಡೆಸುತ್ತಿರುವ ವೆಸ್ಟ್‌ರ್ನ್ ಯೂನಿಯನ್‌ ರೀತಿಯಲ್ಲಿ ಜಗತ್ತಿನ ಒಂದು ಮೂಲೆಯಿಂದ ಇನ್ನೊಂದು ಮೂಲೆಗೆ ಹಣ ವರ್ಗಾವಣೆ ಸೌಲಭ್ಯವನ್ನು ಒದಗಿಸುತ್ತಿದೆ. ಇದೇ ರೀತಿ ಲಿಬ್ರಾ ಮೂಲಕ ಅತೀ ಕಡಿಮೆ ಶುಲ್ಕದಲ್ಲಿ ಜಾಗತಿಕ ಹಣ ವ್ಯವಹಾರವನ್ನು ನಡೆಸುವುದು ಫೇಸ್‌ಬುಕ್‌ನ ಉದ್ದೇಶ ಎಂದು ಹೇಳಲಾಗಿದೆ.

12 ತಿಂಗಳ ಒಳಗೆ 'ಲಿಬ್ರಾ' ಆರಂಭ

ಫೇಸ್‌ಬುಕ್‌ನ ಹೊಸ ಲಿಬ್ರಾ ಡಿಜಿಟಲ್‌ ಕರೆನ್ಸಿ ಮುಂದಿನ ಆರರಿಂದ 12 ತಿಂಗಳ ಒಳಗೆ ಆರಂಭಗೊಳ್ಳಲಿದೆ. ಸುಮಾರು ಎರಡು ಡಜನ್‌ ಪಾಲುದಾರ ಸಂಸ್ಥೆಗಳು ಲಿಬ್ರಾಗೆ ಹಣಕಾಸು ಬೆಂಬಲ ಒದಗಿಸಲಿವೆ. ಇದಕ್ಕಾಗಿ ಫೇಸ್‌ಬುಕ್‌ ತನ್ನ ಹಾಲಿ ಮತ್ತು ಭವಿಷ್ಯತ್ತಿನ ಪಾಲುದಾರ ಸಂಸ್ಥೆಗಳಿಂದ 1 ಶತಕೋಟಿಗ ಡಾಲರ್‌ ಹಣವನ್ನು ಬೆಂಬಲ ನಿಧಿಯಾಗಿ ಎತ್ತುವ ವಿಶ್ವಾಸವನ್ನು ಹೊಂದಿದೆ.

ಫೇಸ್‌ಬುಕ್ ಜೊತೆ ದಿಗ್ಗಜರು

'ಲಿಬ್ರಾ' ಡಿಜಿಟಲ್‌ ಕರೆನ್ಸಿಯನ್ನು ಸೃಷ್ಟಿಸುವಲ್ಲಿ ಫೇಸ್‌ಬುಕ್‌ ಜತೆಗೆ ದಿಗ್ಗಜ ಕಂಪೆನಿಗಳಾದ ಪೇ ಪಾಲ್‌, ಉಬರ್, ಸ್ಪಾಟಿಫೈ, ವೀಸಾ ಮತ್ತು ಮಾಸ್ಟರ್‌ ಕಾರ್ಡ್‌ ಕಂಪೆನಿಗಳು ಕೈಜೋಡಿಸಿವೆ. ವಿಶ್ವದಾದ್ಯಂತ ಸುಲಭ ಹಣ ವರ್ಗಾವಣೆಗೆ ಫೇಸ್‌ಬುಕ್‌ನ ಹೊಸ ಲಿಬ್ರಾ ಡಿಜಿಟಲ್‌ ಕರೆನ್ಸಿ ಉತ್ತಮವಾಗಬಹುದು ಎಂದು ಈ ಕಂಪೆನಿಗಳು ಲಿಬ್ರಾಗೆ ಒತ್ತು ನೀಡಲು ಮುಂದಾಗಿವೆ ಎನ್ನಲಾಗಿದೆ.

ಹೊಸ ಅಪಾಯದ ಸೂಚನೆ?

ಲಿಬ್ರಾ ಕರೆನ್ಸಿಯಿಂದ ವಿಶ್ವ ಹಣ ವರ್ಗಾವಣೆಗೆ ಲಾಭವಿದೆ ಎಂದು ಹೇಳಲಾಗಿದೆ. ಆದರೆ, ಡಿಜಿಟಲ್‌ ಕರೆನ್ಸಿ ಬ್ಯಾಂಕಿಂಗ್‌ ವ್ಯವಸ್ಥೆಗೆ, ರಾಷ್ಟ್ರೀಯ ಕರೆನ್ಸಿಗಳಿಗೆ ಮತ್ತು ಬಳಕೆದಾರರ ಖಾಸಗಿತನಕ್ಕೆ ಭಾರೀ ದೊಡ್ಡ ಸವಾಲು ಮತ್ತು ಸಮಸ್ಯೆಯನ್ನು ಒಡ್ಡಲಿದೆ. ಅದರಲ್ಲೂ ಒಂದು ಖಾಸಾಗಿ ಕಂಪೆನಿ ಡಿಜಿಟಲ್‌ ಕರೆನ್ಸಿ ಹೊಂದುವುದು ಅಪಾಯದ ಸೂಚನೆ ಎಂದು ತಜ್ಞರು ಅಭಿಪ್ರಾಯಪಟ್ಟಿದ್ದಾರೆ.

ಭಾರತದಲ್ಲಿ ಲಿಬ್ರಾ ಕಥೆ?

ಇದೇ ವೇಳೆ ಭಾರತದಲ್ಲಿ ಈ ರೀತಿಯ ಡಿಜಿಟಲ್‌ ಕರೆನ್ಸಿ ಹೊಂದುವುದು, ಮಾರುವುದು, ಖರೀದಿಸುವುದು, ವರ್ಗಾಯಿಸುವುದು ಮತ್ತು ಆದರ ಮೂಲಕ ವಹಿವಾಟು ನಡೆಸುವ ಎಲ್ಲ ರೀತಿಯ ಕೃತ್ಯಗಳನ್ನುಕಾನೂನು ಬಾಹಿರವೆಂದು ಪರಿಗಣಿಸಲಾಗಿದೆ. ಹಾಗಾಗಿ, ಭಾರತದಲ್ಲಿ ಫೇಸ್‌ಬುಕ್‌ನ ಲಿಬ್ರಾ ಕರೆನ್ಸಿಗೆ ಮಾನ್ಯತೆ ಸಿಗುವುದು ಕಷ್ಟ. ಆದರೆ, ಭವಿಷ್ಯವನ್ನು ಬಲ್ಲವರು ಯಾರು ಹೇಳಿ.?