ಮುಂದಿನ ವರ್ಷದಿಂದ ವಿಂಡೋಸ್ 7 ಮತ್ತು 8.1 ಗೆ ಗೂಗಲ್ ಕ್ರೋಮ್ ಬೆಂಬಲ ಇಲ್ಲ!

ಹೌದು, ಪ್ರಮುಖ ಸರ್ಚ್ ಇಂಜಿನ್ ಆಗಿರುವ ಗೂಗಲ್‌ ಕೆಲವು ಬಳಕೆದಾರರಿಗೆ ಶಾಕಿಂಗ್‌ ನ್ಯೂಸ್‌ ನೀಡಿದೆ. ಇನ್ಮುಂದೆ ಗೂಗಲ್ ಕ್ರೋಮ್ ವೆಬ್ ಬ್ರೌಸರ್ ವಿಂಡೋಸ್ 7 ಮತ್ತು 8.1 ಗೆ ಬೆಂಬಲ ನೀಡುವುದಿಲ್ಲ ಎಂದು ತಿಳಿಸಿದೆ. ಪರಿಣಾಮ ವಿಂಡೋಸ್ 7 ಮತ್ತು 8.1 ಬಳಕೆದಾರು ಅಪ್‌ಗ್ರೇಡ್‌ ಆಗಬೇಕಾದ ಅನಿವಾರ್ಯತೆ ಎದುರಾಗಲಿದೆ.

ಗೂಗಲ್‌ ಹೇಳೋದೇನು?

ಗೂಗಲ್ ಕ್ರೋಮ್ ವೆಬ್ ಬ್ರೌಸರ್ ಫೆಬ್ರವರಿ 2023 ರಿಂದ ವಿಂಡೋಸ್ 7 ಮತ್ತು 8.1 ಗೆ ಬೆಂಬಲವನ್ನು ಕೈಬಿಡಲಿದೆ ಎಂದು ಗೂಗಲ್ ಘೋಷಿಸಿದ್ದು, ವಿಂಡೋಸ್ 7 ಮತ್ತು 8.1 ನಲ್ಲಿ ಕ್ರೋಮ್ ವೆಬ್ ಬ್ರೌಸರ್ ನಿಲ್ಲಿಸಿದ ನಂತರ ಕ್ರೋಮ್ ಬಳಕೆದಾರರು ವಿಂಡೋಸ್ 10 ಗೆ ಅಪ್‌ಗ್ರೇಡ್‌ ಆಗಬೇಕಿದೆ ಎಂದು ಕಂಪನಿ ಹೇಳಿದೆ. ಫೆಬ್ರವರಿ 7, 2023 ಕ್ಕೆ ಅಂತ್ಯವಾಗುವ ಕ್ರೋಮ್‌ 110 ಬಿಡುಗಡೆಯೊಂದಿಗೆ ನಾವು ಅಧಿಕೃತವಾಗಿ ವಿಂಡೋಸ್‌ 7 ಮತ್ತು ವಿಂಡೋಸ್‌ 8.1 ಗೆ ನೀಡಲಾಗುವ ಬೆಂಬಲವನ್ನು ಕೊನೆಗೊಳಿಸುತ್ತೇವೆ. ಮುಂದೆ ಇದಕ್ಕೆ ಸಪೋರ್ಟ್‌ ಮಾಡುವ ಕ್ರೋಮ್ ವೆಬ್ ಬ್ರೌಸರ್ ಇರುವುದಿಲ್ಲ ಎಂದು ಉಲ್ಲೇಖಿಸಿದೆ. ಈ ಕಾರಣಕ್ಕೆ ನೀವು ನಿಮ್ಮ ಡಿವೈಸ್‌ ವಿಂಡೋಸ್‌ 10 ಅಥವಾ ಅದಕ್ಕಿಂತಲೂ ಹೆಚ್ಚಿನ ಆವೃತ್ತಿಯಲ್ಲಿ ಕಾರ್ಯನಿರ್ವಹಿಸುತ್ತಿದೆಯಾ ಎಂಬುದನ್ನು ಖಚಿತಪಡಿಸಿಕೊಳ್ಳಬೇಕು ಎಂದು ತಿಳಿಸಿದೆ.

ಕ್ರೋಮ್‌ನ ಹಳೆಯ ಆವೃತ್ತಿಗಳು ಎಂದಿನಂತೆ ಕೆಲಸ ಮಾಡಲಿವೆಯಾದರೂ ಈ ಆಪರೇಟಿಂಗ್ ಸಿಸ್ಟಂಗಳಲ್ಲಿ ಹೆಚ್ಚಿನ ನವೀಕರಣಗಳು ಇರುವುದಿಲ್ಲವಂತೆ. ಅಂದರೆ ವಿಂಡೋಸ್ ವಿಂಡೋಸ್ 7 ಅಥವಾ ವಿಂಡೋಸ್ 8.1 ಬಳಕೆದಾರರಾಗಿದ್ದರೆ, ಇತ್ತೀಚೆಗೆ ಪರಿಚಯಿಸಲಾದ ಭದ್ರತಾ ನವೀಕರಣಗಳು ಮತ್ತು ಇತರೆ ಕ್ರೋಮ್ ಫೀಚರ್ಸ್‌ಗಳು ಇರುವುದಿಲ್ಲ ಎಂದು ಸ್ಪಷ್ಟಪಡಿಸಿದೆ.

65 % ಕ್ಕಿಂತ ಹೆಚ್ಚಿನ ಜನರಿಂದ ಕ್ರೋಮ್‌ ಬಳಕೆ

ಸ್ಟೇಟ್‌ಕೌಂಟರ್ ಗ್ಲೋಬಲ್ ಸ್ಟೇಟ್‌ ಈ ಬಗ್ಗೆ ಮಾಹಿತಿ ನೀಡಿದ್ದು, ಪ್ರಪಂಚದಾದ್ಯಂತ ವಿಂಡೋಸ್ 7 10 % ಗೂ ಹೆಚ್ಚು ಬಳಕೆಯಲ್ಲಿದೆ, ವಿಂಡೋಸ್ 8.1 ಕೇವಲ 2.7% ರಷ್ಟಿದೆ ಎಂದು ವಿವರಿಸಿದ್ದು, ಗೂಗಲ್ ಕ್ರೋಮ್ ವೆಬ್ ಬ್ರೌಸರ್ 65 % ಕ್ಕಿಂತ ಹೆಚ್ಚು ಮಾರುಕಟ್ಟೆ ಪಾಲನ್ನು ಹೊಂದಿದ್ದು, ಇದರ ನಂತರ ಸಫಾರಿ 18 % ಹಾಗೂ ಮೈಕ್ರೋಸಾಫ್ಟ್ ಎಡ್ಜ್ 4.32 % ನೆಟ್‌ವರ್ಕ್‌ ವಲಯದಲ್ಲಿ ಪಾಲುದಾರಿಕೆ ಪಡೆದಿದೆ ಎಂದು ತಿಳಿಸಿದೆ.

ಗೂಗಲ್‌ನ ಇತರೆ ಫೀಚರ್ಸ್‌

ಇನ್ನು ಗೂಗಲ್ ಸ್ಥಳೀಯ ಆಂಡ್ರಾಯ್ಡ್ ಅಪ್ಲಿಕೇಶನ್‌ಗಳಿಗಾಗಿ (ಅಪ್ಲಿಕೇಶನ್ ಪ್ರೋಗ್ರಾಮಿಂಗ್ ಇಂಟರ್ಫೇಸ್) API ಜೊತೆಗೆ ಈ ವರ್ಷದ ನಂತರ ಪಾಸ್‌ಕೀಗಳಿಗೆ ಬೆಂಬಲವನ್ನು ಹೊರತರುವುದಾಗಿ ಈ ತಿಂಗಳ ಆರಂಭದಲ್ಲಿ ಘೋಷಿಸಿತು. ಜೊತೆಗೆ ಅಪ್ಲಿಕೇಶನ್‌ಗಳ ಉತ್ತಮ ಲಿಸ್ಟ್‌ಗಾಗಿ ಪ್ಲೇ ಸ್ಟೋರ್‌ಗೂ ನೂತನ ಫೀಚರ್ಸ್‌ ಅನ್ನು ಘೋಷಿಸಿದೆ. ಇದೆಲ್ಲಕ್ಕೂ ಮಿಗಿಲಾಗಿ ಕಂಪೆನಿಯು ಈ ವರ್ಷದ ಆರಂಭದಲ್ಲಿ ಜರುಗಿದ ತನ್ನ ವಾರ್ಷಿಕ ಡೆವಲಪರ್ ಸಮ್ಮೇಳನ I/O ನಲ್ಲಿ ಕಂಪೆನಿಯು ತನ್ನ ಸೇವೆಗಳಲ್ಲಿ ಏನೆಲ್ಲಾ ನವೀಕರಣ ತರಲಾಗಿದೆ, ಮುಂದೆ ಏನೆಲ್ಲಾ ಪರಿಚಯಿಸಲಾಗುತ್ತದೆ ಎಂಬುದರ ಬಗ್ಗೆ ಮಾಹಿತಿ ನೀಡಿತ್ತು.