ಗೂಗಲ್‌ IO 2022 ಇಂದು ಶುರು!..ಲೈವ್‌ ವೀಕ್ಷಣೆ ಹೇಗೆ?..ನಿರೀಕ್ಷೆ ಏನು?

ಟೆಕ್ ದಿಗ್ಗಜ ಗೂಗಲ್‌ ನ ವಾರ್ಷಿಕ ಡೆವಲಪರ್ ಸಮ್ಮೇಳನ Google I/O 2022 ಇಂದು (ಭಾರತೀಯ ಕಾಲಮಾನ ರಾತ್ರಿ 10:30) ಪ್ರಾರಂಭ ಆಗಲಿದೆ. ಈ ಬಾರಿ Google IO 2022 ಮೇ 11 ಮತ್ತು 12 ರಂದು ಎರಡು ದಿನಗಳ ಕಾರ್ಯಕ್ರಮ ಇದಾಗಿರುತ್ತದೆ. ಇನ್ನು ಈ ಕಾರ್ಯಕ್ರಮ ಕ್ಯಾಲಿಫೋರ್ನಿಯಾದ ಮೌಂಟೇನ್ ವ್ಯೂನಲ್ಲಿರುವ ಶೋರ್‌ಲೈನ್ ಆಂಫಿಥಿಯೇಟರ್‌ನಲ್ಲಿ ಆಯೋಜನೆ ಆಗಿದೆ. ಈ ಕಾರ್ಯಕ್ರಮ ಸಾಕಷ್ಟು ಹೊಸ ತಂತ್ರಜ್ಞಾನ ಅನಾವರಣಕ್ಕೆ ಸಾಕ್ಷಿ ಆಗಲಿದೆ.

ಗೂಗಲ್‌ ಐಓ 2022 ಕಾರ್ಯಕ್ರಮವನ್ನು ಗ್ರಾಹಕರು ಅಧಿಕೃತ ಗೂಗಲ್‌ ಯೂಟ್ಯೂಬ್‌ ಚಾನಲ್‌ನಲ್ಲಿ ಲೈವ್ ಆಗಿ ವೀಕ್ಷಿಸಬಹುದು. ಹಾಗೆಯೇ ಕಾರ್ಯಕ್ರಮದ ಲೈವ್ ಅಪ್‌ಡೇಟ್‌ಗಳಿಗಾಗಿ, ಬಳಕೆದಾರರು ಟ್ವಿಟರ್ ಮತ್ತು ಇನ್‌ಸ್ಟಾಗ್ರಾಮ್‌ ನಂತಹ ಸಾಮಾಜಿಕ ಮಾಧ್ಯಮ ಪ್ಲಾಟ್‌ಫಾರ್ಮ್‌ಗಳಲ್ಲಿ ಗೂಗಲ್‌ ಖಾತೆಯನ್ನು ಫಾಲೋ ಮಾಡಬಹುದು. ಗೂಗಲ್‌ನ ಸಿಇಒ, ಸುಂದರ್ ಪಿಚೈ ಮತ್ತು ಗೂಗಲ್‌ನ ಇತರ ವಿಪಿಗಳು ಈ ಕೀನೋಟ್ ಅನ್ನು ಹೋಸ್ಟ್ ಮಾಡುವ ಸಾಧ್ಯತೆಯಿದೆ. ಹಾಗಾದರೆ ಈ ಕಾರ್ಯಕ್ರಮದಲ್ಲಿ ನಾವು ಏನನ್ನು ನಿರೀಕ್ಷಿಸಬಹುದು ಎಂಬುದನ್ನು ಮುಂದೆ ತಿಳಿಯೋಣ ಬನ್ನಿರಿ.

ಆಂಡ್ರಾಯ್ಡ್‌ 13 ಓಎಸ್‌
ಆಂಡ್ರಾಯ್ಡ್ ಅಪ್‌ಡೇಟ್‌ ಸುದ್ದಿ ಹೆಚ್ಚು ಗಮನ ಸೆಳೆಯುತ್ತದೆ. ಈ ಕಾರ್ಯಕ್ರಮದಲ್ಲಿ ಗೂಗಲ್‌ ಆಂಡ್ರಾಯ್ಡ್‌ 13 ಬಿಟಾ ಆವೃತ್ತಿ ಅನ್ನು ಪ್ರಕಟಿಸುವ ನಿರೀಕ್ಷೆಯಿದೆ. ಹೊಸ ಆಂಡ್ರಾಯ್ಡ್‌ 13 ಬೀಟಾದ ಎಲ್ಲಾ ಹೊಸ ವೈಶಿಷ್ಟ್ಯಗಳನ್ನು ಪ್ರಕಟಿಸುವ ನಿರೀಕ್ಷೆಯಿದೆ. ಆಂಡ್ರಾಯ್ಡ್‌ 13 ಓಎಸ್‌ನಲ್ಲಿ ಹೆಚ್ಚಿನ ಬದಲಾವಣೆಗಳನ್ನು ನಿರೀಕ್ಷಿಸಲಾಗಿದೆ. ಹಿಂದಿನ ವರದಿಗಳ ಪ್ರಕಾರ, ಈ ಓಎಸ್‌ ಪಿಕ್ಸೆಲ್ 6 ಮಾದರಿಗಳಿಗೆ ಆಪಲ್ ತರಹದ ಪ್ರಾದೇಶಿಕ ಆಡಿಯೊ ಫೀಚರ್‌ ಅನ್ನು ಮತ್ತು ಒಂದೇ eSIM ನಲ್ಲಿ ಎರಡು ವಾಹಕ ಸಂಪರ್ಕಗಳನ್ನು ಪಡೆಯುವ ಸಾಧ್ಯತೆಯಿದೆ.

ಗೂಗಲ್‌ ಪಿಕ್ಸಲ್‌ 6a
ಗೂಗಲ್‌ನಿಂದ ಹೆಚ್ಚು ವದಂತಿಗಳಿರುವ ಪಿಕ್ಸಲ್‌ 6a ಮಧ್ಯಮ ಶ್ರೇಣಿಯ ಸ್ಮಾರ್ಟ್‌ಫೋನ್ ಅನ್ನು ಅದೇ ವೇದಿಕೆಯಲ್ಲಿ ಘೋಷಿಸಬಹುದು. ಹಿಂದಿನ ಸುದ್ದಿ ಮತ್ತು ವದಂತಿಗಳ ಪ್ರಕಾರ, ಪಿಕ್ಸಲ್‌ 6a ಎರಡು ಆರ್ಮ್ ಕಾರ್ಟೆಕ್ಸ್-X1 ಕೋರ್‌ಗಳೊಂದಿಗೆ 2.8GHz, ಎರಡು ಕಾರ್ಟೆಕ್ಸ್-A76 ಕೋರ್‌ಗಳು 2.25GHz ಮತ್ತು ನಾಲ್ಕು ದಕ್ಷತೆಯ ಕೋರ್‌ಗಳು 1.8GHz ನಲ್ಲಿ ಟೆನ್ಸರ್ ಪ್ರೊಸೆಸರ್‌ನೊಂದಿಗೆ ಬರುತ್ತದೆ. ಫೋನ್ ಕನಿಷ್ಠ 6GB RAM ಅನ್ನು ನೀಡುವ ನಿರೀಕ್ಷೆಯಿದೆ.

ವೇರ್ ಓಎಸ್
ಗೂಗಲ್‌ನ ಈ ಕಾರ್ಯಕ್ರಮದಲ್ಲಿ ಆಂಡ್ರಾಯ್ಡ್‌ 13 ಜೊತೆಗೆ ವೇರ್ ಓಎಸ್ (Wear OS) ಅನ್ನು ನಿರೀಕ್ಷಿಸಬಹುದಾಗಿದೆ. ಕಳೆದ ವರ್ಷದ Google IO ನಲ್ಲಿ, Wear OS ಅನ್ನು ಘೋಷಿಸಲು Google ಮತ್ತು Samsung ತಂಡಗಳು ಸೇರಿಕೊಂಡವು. ಈ ವರ್ಷದ ನಂತರ ಬೆರಳೆಣಿಕೆಯ ಸ್ಮಾರ್ಟ್‌ವಾಚ್‌ಗಳು Wear OS 3.0 ನವೀಕರಣವನ್ನು ಸ್ವೀಕರಿಸುವ ನಿರೀಕ್ಷೆಯಿದೆ.