ಗೂಗಲ್‌ನಿಂದ ಕೋವಿಡ್‌-19ಗೆ ಸಂಬಂಧಿಸಿದ ಫಿಶಿಂಗ್‌ ಇ-ಮೇಲ್‌ಗಳಿಗೆ ಬ್ರೇಕ್!

ಹೌದು, ಸೈಬರ್ ವಂಚಕರು ಜನರಿಗೆ ವಂಚಿಸುವ ಉದ್ದೇಶದಿಂದ ನಕಲಿ ಕೊರೊನಾ ವೈರಸ್ ಮ್ಯಾಪ್‌ ಹಾಗೂ ನಕಲಿ ಕೊರೊನಾ ವೈರಸ್‌ ಟ್ರ್ಯಾಕಿಂಗ್ ಅಪ್ಲಿಕೇಶನ್‌ಗಳನ್ನು ಬಳಸುತ್ತಿದ್ದು, ಗೂಗಲ್ ಈ ತರಹದ ಫಿಶಿಂಗ್ ದಾಳಿಗಳನ್ನು ತಡೆಯುವ ಕಾರ್ಯ ಮಾಡುತ್ತಿದೆ. ಗೂಗಲ್ ಸಂಸ್ಥೆಯು ತನ್ನ ಜಿ-ಮೇಲ್ ಸೇವೆಯಲ್ಲಿ ಪ್ರತಿದಿನ ಸುಮಾರು 18 ಮಿಲಿಯನ್‌ನಷ್ಟು ಕೊರೊನಾ ವೈರಸ್ ಸಂಬಂಧಿತ ಫಿಶಿಂಗ್‌ ಇಮೇಲ್‌ಗಳನ್ನು ಗೂಗಲ್ ನಿರ್ಬಂಧಿಸುತ್ತಿದೆ ಎಂದು ಕಂಪನಿ ಹೇಳಿದೆ.

ಫಿಶಿಂಗ್ ಇ-ಮೇಲ್‌ಗಳ ಜೊತೆಗೆ ವೈರಸ್ ಹರಡುವಿಕೆಗೆ ಸಂಬಂಧಿಸಿದ ಲಕ್ಷಾಂತರ ಸ್ಪ್ಯಾಮ್ ಸಂದೇಶಗಳನ್ನು(ಎಸ್‌ಎಮ್‌ಎಸ್‌) ನಿರ್ಬಂಧಿಸುತ್ತಿದೆ. ಪ್ರತಿದಿನ ಸುಮಾರು 240 ದಶಲಕ್ಷಕ್ಕೂ ಹೆಚ್ಚಿನ COVID-19ಗೆ ಸಂಬಂಧಿತ ಸ್ಪ್ಯಾಮ್ ಮೆಸೆಜ್‌ಗಳನ್ನು ನಿರ್ಬಂಧಿಸುವ ಕೆಲಸ ಮಾಡುತ್ತಿದೆ. ಸಂಸ್ಥೆಯ ML ಮಾಡೆಲ್‌ಗಳು ಶೇ.99.9% ನಕಲಿ ಇ-ಮೇಲ್, ಫಿಶಿಂಗ್ ಇಮೇಲ್, ಮಾಲ್‌ವೇರ್‌ ಹಾಗೂ ಸ್ಪ್ಯಾಮ್ ಮೆಸೆಜ್‌ಗಳನ್ನು ಜನರನ್ನು ತಲುಪದಂತೆ ತಡೆಯುತ್ತವೆ ಎಂದು ಸಂಸ್ಥೆ ಹೇಳಿದೆ.

ಗೂಗಲ್ ತಡೆದ ಇ-ಮೇಲ್‌ಗಳ ಪಟ್ಟಿಯಲ್ಲಿ ಕೊರೊನಾ ವೈರಸ್‌ ಬಗೆಗಿನ ಭಯ ಹಾಗೂ ತುರ್ತುಸ್ಥಿತಿಯ ಸಂದರ್ಭವನ್ನು ದುರುದ್ದೇಶಕ್ಕಾಗಿ ಬಳಸಿಕೊಳ್ಳುವಂತಹ ಫಿಶಿಂಗ್ ಇ-ಮೇಲ್ ಇರುವುದಾಗಿ ಗೂಗಲ್ ತಿಳಿಸಿದೆ. ಹಾಗೆಯೇ ಸರ್ಕಾರಿ ಸಂಸ್ಥೆಗಳಂತೆ ನಕಲಿ ಹಾದಿಯ ಮೂಲಕ ದೇಣಿಗೆ ಕೋರಿರುವ ವಂಚನೆಯ ಇ-ಮೇಲ್‌ಗಳು, ಸರ್ಕಾರ ಪರಿಕಾರ ಪ್ಯಾಕೇಜ್‌ಗಳಂತೆ ನಕಲಿ ದಾರಿಗಳ ಮತ್ತು ಎಸ್‌ಎಮ್‌ಎಸ್‌ಗಳ ಮೂಲಕ ಜನರಿಗೆ ಮೋಸ್ ಮಾಡುವ ಇ ಮೇಲ್‌ಗಳು ಸೇರಿವೆ.

ಫಿಶಿಂಗ್ ಇ-ಮೇಲ್ ಮತ್ತು ಮಾಲ್‌ವೇರ್ ನಿಯಂತ್ರಣ ಮಾಡಲು ಗೂಗಲ್ ಜಿ-ಸೂಟ್‌ನಲ್ಲಿ ಸುಧಾರಿತ ಸೆಟ್ಟಿಂಗ್‌ಗಳನ್ನು ಪೂರ್ವನಿಯೋಜಿತವಾಗಿ ವ್ಯವಸ್ಥೆ ಮಾಡಿರುವುದಾಗಿ ಹೇಳಿದೆ. ಹಾಗೂ ಎಲ್ಲಾ ಜಿ ಸೂಟ್ ಬಳಕೆದಾರರು ಈ ಸ್ವಯಂಚಾಲಿತವಾಗಿ ಈ ಪೂರ್ವಭಾವಿ ರಕ್ಷಣೆ ವ್ಯವಸ್ಥೆ ದೊರೆಯುತ್ತದೆ ಎಂದು ಸಂಸ್ಥೆ ಹೇಳಿದೆ.