ಫ್ಲಿಪ್‌ಕಾರ್ಟ್ ಸಂಸ್ಥಾಪಕ 'ಸಚಿನ್​ ಬನ್ಸಾಲ್' ಈ ವರ್ಷ ಕಟ್ಟಿದ ತೆರಿಗೆ ₹699 ಕೋಟಿ!!

ಭಾರತದ ಜನಪ್ರಿಯ ಶಾಪಿಂಗ್ ಜಾಲತಾಣ ಫ್ಲಿಪ್‌ಕಾರ್ಟ್ ಸಂಸ್ಥಾಪಕ 'ಸಚಿನ್​ ಬನ್ಸಾಲ್' ಅವರು ಈ ವರ್ಷದ ಆರಂಭದಲ್ಲಿ ಭಾರೀ ತೆರಿಗೆ ಪಾವತಿ​ ಮಾಡಿ ಎಲ್ಲರ ಹುಬ್ಬೇರಿಸುವಂತೆ ಮಾಡಿದ್ದಾರೆ. ಫ್ಲಿಪ್‌ಕಾರ್ಟ್ ಅನ್ನು ಅಮೆರಿಕಾದ ವಾಲ್‌ಮಾರ್ಟ್ ಖರೀದಿಸಿದ ನಂತರ, ಪ್ರಸಕ್ತ ಆರ್ಥಿಕ ವರ್ಷದ ಮೊದಲ ಕ್ವಾರ್ಟರ್​​ನ ಮುಂಗಡ ತೆರಿಗೆಯಾಗಿ ಸಚಿನ್​ ಬನ್ಸಾಲ್ ಅವರು ಒಟ್ಟು ₹699 ಕೋಟಿ ತೆರಿಗೆ ಪಾವತಿಸಿದ್ದಾರೆ ಎಂಬ ಮಾಹಿತಿ ಹೊರಬಿದ್ದಿದೆ.

ಹೌದು, ಟೈಮ್ಸ್ ಆಫ್ ಇಂಡಿಯಾ ಪತ್ರಿಕೆ ವರದಿ ಮಾಡಿರುವಂತೆ, ಅಮೆರಿಕಾದ ರೀಟೇಲ್​​ ದಿಗ್ಗಜ ವಾಲ್​ಮಾರ್ಟ್​​​​ಗೆ ಫ್ಲಿಪ್​ಕಾರ್ಟ್​ನ ತಮ್ಮ ಶೇರ್​​​​​​ ಮಾರಾಟದಿಂದ ಬಂದ ಲಾಭದ ​ಟ್ಯಾಕ್ಸ್​ ಸೇರಿದಂತೆ ಒಟ್ಟು ₹699 ಕೋಟಿ ತೆರಿಗೆಯನ್ನು ಸಚಿನ್​ ಬನ್ಸಾಲ್ ಅವರು ಪಾವತಿಸಿದ್ದಾರೆ ಎಂದು ತಿಳಿದುಬಂದಿದೆ. ಆದರೆ, ಸಚಿನ್​ ಬನ್ಸಾಲ್' ಅವರು ಫ್ಲಿಪ್​ಕಾರ್ಟ್​ ಮಾರಾಟದಿಂದ ಬಂದ ಒಟ್ಟು ಹಣ ಎಷ್ಟು ಎಂಬುದನ್ನು ವಿವರಿಸಿಲ್ಲ ಎಂದು ಹೇಳಲಾಗಿದೆ.

ಕಳೆದ ವರ್ಷ ಫ್ಲಿಪ್​ಕಾರ್ಟ್​​ನ ತಮ್ಮ ಶೇರುಗಳ​ ಮಾರಾಟದಿಂದ ಎಷ್ಟು ಕ್ಯಾಪಿಟಲ್​ ಗೇನ್ಸ್​ ಬಂದಿದೆ ಎನ್ನುವುದನ್ನ ಬಹಿರಂಗಪಡಿಸಲು ಸಚಿನ್​​​ ಹಾಗೂ ಬಿನ್ನಿ ಬನ್ಸಾಲ್​ ಸೇರಿದಂತೆ ಇನ್ನಿತರೆ ಪಾಲುದಾರರಿಗೆ, ಆದಾಯ ತೆರಿಗೆ ಇಲಾಖೆ ನೋಟಿಸ್​ ನೀಡಿತ್ತು. ಹಾಗೇ ವಾಲ್​ಮಾರ್ಟ್​​ಗೂ ಕೂಡ ನೋಟಿಸ್​ ಜಾರಿ ಮಾಡಲಾಗಿತ್ತು. ಇದಾದ ನಂತರ, ಕಳೆದ ವರ್ಷದ ಕೊನೆಯಲ್ಲಿ ವಾಲ್​ಮಾರ್ಟ್​​ ಆದಾಯ ತೆರಿಗೆ ಇಲಾಖೆಗೆ ₹7,440 ಕೋಟಿ ತೆರಿಗೆ(ವಿತ್​​ಹೋಲ್ಡಿಂಗ್​​ ಟ್ಯಾಕ್ಸ್​​) ಪಾವತಿ ಮಾಡಿತ್ತು.

ಇದೀಗ ಸಚಿನ್​ ಬನ್ಸಾಲ್' ಅವರು ಓರ್ವರೇ ₹699 ಕೋಟಿ ತೆರಿಗೆ ಪಾವತಿಸಿ ಎಲ್ಲರ ಹುಬ್ಬೇರಿಸುವವಂತೆ ಮಾಡಿದ್ದಾರೆ. ಫ್ಲಿಪ್‌ಕಾರ್ಟ್ ಮತ್ತು ವಾಲ್‌ಮಾರ್ಟ್ ಡೀಲ್​​ನಿಂದ ಪ್ರತಿಯೊಬ್ಬರಿಗೆ ಎಷ್ಟು ಲಾಭ ಬಂದಿದೆ ಎಂಬ ಬಗ್ಗೆ ಹಾಗೂ ಫ್ಲಿಪ್​ಕಾರ್ಟ್​​ನ 46 ಷೇರುದಾರರ ಬಗ್ಗೆ ಮಾಹಿತಿ ನೀಡುವಂತೆ ವಾಲ್​​ಮಾರ್ಟ್​​ಗೆ ಕೇಳಲಾದ ನಂತರ ಸಚಿನ್​ ಬನ್ಸಾಲ್' ಅವರು ತೆರಿಗೆ ಪಾವತಿಸಿದ್ದಾರೆ. ಆದರೆ, ಕ್ಯಾಪಿಟಲ್​ ಗೇನ್ಸ್​​ ತೆರಿಗೆ ಎಷ್ಟು ಹಾಗೂ ತೆರಿಗೆ ಪಾವತಿಯ ಶೆಡ್ಯೂಲ್​ ಬಗ್ಗೆ ವಿವರಿಸಿಲ್ಲ.

ಇನ್ನು ಸಚಿನ್​ ಬನ್ಸಾಲ್​​​ 2018-19ನೇ ಸಾಲಿನ ಮೊದಲ ಕ್ವಾರ್ಟರ್‌ನಲ್ಲಿ ಮುಂಗಡ ತೆರಿಗೆಯಾಗಿ ₹699 ಕೋಟಿ ಪಾವತಿ​ ಮಾಡಿದ್ದರೆ,​​ ಅವರ ಪಾರ್ಟ್‌ನರ್​ ಹಾಗೂ ಫ್ಲಿಪ್​​ಕಾರ್ಟ್​ ಸಹಸಂಸ್ಥಾಪಕ ಬಿನ್ನಿ ಬನ್ಸಾಲ್​ ಅವರು ತಮ್ಮ ಶೇರ್​​ನ ಮಾರಾಟದಿಂದ ಬಂದ ಕ್ಯಾಪಿಟಲ್​ ಗೇನ್ಸ್​ (ಲಾಭಾಂಶ) ಎಷ್ಟು ಎನ್ನುವುದನ್ನು ಇನ್ನೂ ಬಹಿರಂಗಪಡಿಸಬೇಕಿದೆ ಎಂದು ತೆರಿಗೆ ಇಲಾಖೆಯ ಮೂಲಗಳು ಮಾಧ್ಯಮಗಳಿಗೆ ತಿಳಿಸಿವೆ.