ನೆಕ್‌ ಬ್ಯಾಂಡ್‌ ಶೈಲಿಯ ಸ್ಯಾಮ್‌ಸಂಗ್ ಲೆವೆಲ್ U2 ಹೆಡ್‌ಫೋನ್‌ ಲಾಂಚ್‌!

Published: Thursday, February 4, 2021, 17:08 [IST]

ಸ್ಮಾರ್ಟ್‌ಫೋನ್‌ ದೈತ್ಯ ಸ್ಯಾಮ್‌ಸಂಗ್‌ ಸಂಸ್ಥೆ ತನ್ನ ಗುಣಮಟ್ಟದ ಹೆಡ್‌ಫೋನ್‌ಗಳಿಗೂ ಹೆಸರುವಾಸಿಯಾಗಿದೆ. ಮಾರುಕಟ್ಟೆಯಲ್ಲಿ ಈಗಾಗಲೇ ಅನೇಕ ಹೆಡ್‌ಫೋನ್‌ಗಳನ್ನ ಸ್ಯಾಮ್‌ಸಂಗ್‌ ಪರಿಚಯಿಸಿದೆ. ಸದ್ಯ ಇದೀಗ ತನ್ನ ಹೊಸ ಸ್ಯಾಮ್‌ಸಂಗ್ ಲೆವೆಲ್ U2 ನೆಕ್‌ಬ್ಯಾಂಡ್ ಶೈಲಿಯ ವಾಯರ್‌ಲೆಸ್ ಹೆಡ್‌ಫೋನ್‌ಗಳನ್ನು ಭಾರತದಲ್ಲಿ ಬಿಡುಗಡೆ ಮಾಡಿದೆ. ಇನ್ನು ಈ ಹೊಸ ಹೆಡ್‌ಫೋನ್‌ಗಳು ಸಿಂಗಲ್‌ ಚಾರ್ಜ್‌ನಲ್ಲಿ 500 ಗಂಟೆಗಳ ಸ್ಟ್ಯಾಂಡ್‌ಬೈ ಟೈಂ ನೀಡುವಂತೆ ವಿನ್ಯಾಸಗೊಳಿಸಲಾಗಿದೆ.

ಹೌದು, ಸ್ಯಾಮ್‌ಸಂಗ್ ಸಂಸ್ಥೆ ತನ್ನ ಹೊಸ ಸ್ಯಾಮ್‌ಸಂಗ್‌ ಲೆವೆಲ್‌ U2 ನೆಕ್‌ಬ್ಯಾಂಡ್‌ ಅನ್ನು ಭಾರತದಲ್ಲಿ ಅನಾವರಣಗೊಳಿಸಿದೆ. ಈ ಹೆಡ್‌ಫೋನ್‌ 12mm ಆಡಿಯೊ ಡ್ರೈವರ್‌ ಅನ್ನು ಹೊಂದಿದ್ದು, IPX 2-ರೇಟೆಡ್ ಬಿಲ್ಡ್ ವಾಟರ್‌ ರೆಸಿಸ್ಟೆನ್ಸ್‌ ಅನ್ನು ಸಹ ಒದಗಿಸಿದೆ. ಜೊತೆಗೆ ಇದರಲ್ಲಿ ಅತ್ಯುತ್ತಮ ಸೌಂಡ್‌ ಪ್ರೊಡಕ್ಷನ್‌ಗಾಗಿ ಸ್ಯಾಮ್‌ಸಂಗ್‌ನ ಸ್ವಾಮ್ಯದ ಸ್ಕೇಲೆಬಲ್ ಕೋಡೆಕ್ ತಂತ್ರಜ್ಞಾನವನ್ನು ನೀಡಲಾಗಿದೆ. ಇನ್ನುಳಿದಂತೆ ಈ ಹೆಡ್‌ಫೋನ್‌ ವಿಶೇಷತೆ ಏನು ಅನ್ನೊದನ್ನ ಈ ಲೇಖನದಲ್ಲಿ ತಿಳಿಸಿಕೊಡ್ತಿವಿ ಓದಿರಿ.

ಸ್ಯಾಮ್‌ಸಂಗ್ ಲೆವೆಲ್ U2 ಹೆಡ್‌ಫೋನ್‌ 12mm ಆಡಿಯೋ ಡ್ರೈವರ್‌ ಅನ್ನು ಹೊಂದಿದೆ. ಇದು 32 ಓಮ್‌ಗಳ ಪ್ರತಿರೋಧ ಮತ್ತು 20,000Hz ಫ್ರಿಕ್ವೆನ್ಸಿ ರೆಸ್ಪಾನ್ಸ್‌ ಅನ್ನು ಹೊಂದಿರುತ್ತದೆ. ಇನ್ನು ಈ ಹೆಡ್‌ಫೋನ್ಸ್‌ ಬ್ಲೂಟೂತ್ 5.0 ಕನೆಕ್ಟಿವಿಟಿ ಜೊತೆಗೆ ಎರಡು ಮೈಕ್ರೊಫೋನ್‌ಗಳೊಂದಿಗೆ ಬರಲಿದೆ. ಇದಲ್ಲದೆ, ಎಎಸಿ, ಎಸ್‌ಬಿಸಿ ಮತ್ತು ಸ್ಕೇಲೆಬಲ್ ಕೊಡೆಕ್‌ಗೆ ಬೆಂಬಲವನ್ನು ಸಹ ಒಳಗೊಂಡಿದೆ. ಇದಲ್ಲದೆ ಈ ಹೆಡ್‌ಫೋನ್‌ ನೆಕ್‌ಬ್ಯಾಂಡ್ ವಿನ್ಯಾಸವನ್ನು ಒದಗಿಸಿದ್ದು, ಲೆವೆಲ್ U2 ಹೆಡ್‌ಫೋನ್‌ಗಳನ್ನು ನಿಮ್ಮ ಕುತ್ತಿಗೆಗೆ ಹಿತಕರವಾಗಿ ಕುಳಿತುಕೊಳ್ಳಲು ಅನುವು ಮಾಡಿಕೊಡುತ್ತದೆ.

ಇನ್ನು ಈ ಹೆಡ್‌ಫೋನ್‌ ಸಂಪರ್ಕಿತ ಫೋನ್ ಅನ್ನು ತೆಗೆದುಕೊಳ್ಳದೆ ಬಳಕೆದಾರರಿಗೆ ಕರೆಗಳನ್ನು ಸ್ವೀಕರಿಸಲು, ಮ್ಯೂಟ್ ಮಾಡಲು ಮತ್ತು ತಿರಸ್ಕರಿಸಲು ಅವಕಾಶವನ್ನು ನೀಡಲಿದೆ. ಇನ್ನು ಈ ಹೆಡ್‌ಫೋನ್‌ಗಳು ಇಂಟರ್‌ಬಿಲ್ಟ್‌ ಬ್ಯಾಟರಿಯನ್ನು ಸಹ ಒಳಗೊಂಡಿದ್ದು, ಇದು 500 ಗಂಟೆಗಳ ಸ್ಟ್ಯಾಂಡ್‌ಬೈ ಟೈಂ, 18 ಗಂಟೆಗಳ ಮ್ಯೂಸಿಕ್‌ ಪ್ಲೇಬ್ಯಾಕ್ ಅಥವಾ ಸಿಂಗಲ್‌ ಚಾರ್ಜ್‌ನಲ್ಲಿ 13 ಗಂಟೆಗಳ ಟಾಕ್‌ಟೈಮ್ ಅನ್ನು ನೀಡುತ್ತದೆ. ಇದಲ್ಲದೆ, ಚಾರ್ಜಿಂಗ್‌ಗಾಗಿ ಯುಎಸ್‌ಬಿ ಟೈಪ್-ಸಿ ಪೋರ್ಟ್ ಅನ್ನು ಸಹ ಹೊಂದಿದೆ.

ಸದ್ಯ ಭಾರತದಲ್ಲಿ ಬಿಡುಗಡೆ ಆಗಿರುವ ಸ್ಯಾಮ್‌ಸಂಗ್ ಲೆವೆಲ್ U2 ಬೆಲೆ 1,999. ರೂ ಆಗಿದೆ. ಇನ್ನು ಈ ಹೆಡ್‌ಫೋನ್‌ಗಳು ಕಪ್ಪು ಮತ್ತು ನೀಲಿ ಬಣ್ಣದ ಆಯ್ಕೆಗಳಲ್ಲಿ ಲಭ್ಯವಾಗಲಿದೆ. ಜೊತೆಗೆ ಈ ಹೆಡ್‌ಫೋನ್‌ ಅನ್ನು ಫ್ಲಿಪ್‌ಕಾರ್ಟ್ ಮತ್ತು ಸ್ಯಾಮ್‌ಸಂಗ್ ಇಂಡಿಯಾ ಆನ್‌ಲೈನ್ ಸ್ಟೋರ್ ಮೂಲಕ ಪ್ರತ್ಯೇಕವಾಗಿ ಖರೀದಿಸಬಹುದಾಗಿದೆ.