ಎಚ್ಚರ..! ಸಿಮ್ ಸ್ವಾಪ್‌ ಮೂಲಕ ನಿಮ್ಮ ಖಾತೆಗೆ ಕನ್ನ ಹಾಕುವ ಖದೀಮರು

‘ಸಿಮ್ ಸ್ವಾಪ್'

ಹ್ಯಾಕರ್ಸ್‌ಗಳು ಸ್ಮಾರ್ಟ್‌ಫೋನ್ ಬಳಕೆದಾರರ ಕ್ರೆಡಿಟ್ ಕಾರ್ಡ್- ಡೆಬಿಟ್ ಕಾರ್ಡ್‌ಗಳ ಮಾಹಿತಿಯನ್ನು ವಿವಿಧ ಮೂಲಗಳಿಂದ ಸಂಗ್ರಹಿಸಿ, OTP ಬರುವ ಸಿಮ್ ಕಾರ್ಡ್‌ಗಳನ್ನು ಸ್ವಾಪ್ ಮಾಡುವ ಮೂಲಕ ವಂಚನೆ ಮಾಡಲು ಮುಂದಾಗಿದ್ದಾರೆ. ಇಷ್ಟು ದಿನ ನಿಮ್ಮ ಕ್ರೆಡಿಟ್ ಕಾರ್ಡ್- ಡೆಬಿಟ್ ಕಾರ್ಡ್‌ಗಳನ್ನು ರಕ್ಷಿಸಿಕೊಂಡಂತೆ ನಿಮ್ಮ ಸಿಮ್ ಕಾರ್ಡ್‌ಗಳನ್ನು ಜೋಪಾನ ಮಾಡಿಕೊಳ್ಳುವುದು ಉತ್ತಮ.

ಯಾರೊಂದಿಗೂ ಹಂಚಿಕೊಳ್ಳಬೇಡಿ:

ನಿಮ್ಮ ಸಿಮ್‌ ನಂಬರ್ ಅನ್ನು ಯಾವುದೇ ಕಾರಣಕ್ಕೂ ಯಾರೊಂದಿಗೂ ಹಂಚಿಕೊಳ್ಳಬೇಡಿ. ಕಾರಣ ನಿಮ್ಮ ಸಿಮ್ ಹಿಂಭಾಗದಲ್ಲಿರುವ ನಂಬರ್ ಅನ್ನು ಪಡೆದುಕೊಂಡವರು ನಕಲಿ ಸಿಮ್ ಕಾರ್ಡ್ ಅನ್ನು ನಿಮಗೆ ತಿಳಿಯದಂತೆ ಪಡೆದುಕೊಂಡು ನಿಮ್ಮ OTPಗಳನ್ನು ಕದಿಯಬಹುದಾಗಿದೆ.

ಕರೆ ಬರಲಿದೆ:

ನಾವು ಮೊಬೈಲ್ ಸಂಸ್ಥೆಯಿಂದ ಕರೆಮಾಡುತ್ತಿದ್ದೇವೆ ನಿಮ್ಮ ಸಿಮ್‌ ಕಾರ್ಡಿನ ಇಪ್ಪತ್ತು ಸಂಖ್ಯೆಯನ್ನು ತಿಳಿಸಿ, ಇಲ್ಲವಾದರೆ ನಿಮ್ಮ ಸಿಮ್ ಕಾರ್ಡ್ ಸ್ಥಬ್ಧವಾಗಲಿದೆ ಎನ್ನುವ ಭೀತಿಯನ್ನು ಹುಟ್ಟಿಸಿ ಮಾಹಿತಿಯನ್ನು ಪಡೆದುಕೊಳ್ಳುತ್ತಾರೆ. ಯಾವುದೇ ಟೆಲಿಕಾಂ ಕಂಪನಿಗಳು ನಿಮಗೆ ಕರೆ ಮಾಡಿ ಈ ರೀತಿಯ ಮಾಹಿತಿಯನ್ನು ಪಡೆಯುವುದಿಲ್ಲ.

ಹೆಚ್ಚಾಗುತ್ತಿರುವ ಪ್ರಕರಣ:

ದೇಶದ ವಿವಿಧ ಭಾಗದಲ್ಲಿ ಸಿಮ್ ಸ್ವಾಪ್ ಪ್ರಕರಣಗಳು ಹೆಚ್ಚಾಗುತ್ತಿದೆ. ಅದರಲ್ಲಿಯೂ ಆಧಾರ್ ಕಾರ್ಡ್ ಲಿಂಕ್ ಮಾಡಿಸಲು ಹೋದ ಸಂದರ್ಭದಲ್ಲಿ, ನಕಲಿ ಸಿಮ್ ಪಡೆಯಲು ಮುಂದಾದ ಸಂದರ್ಭದಲ್ಲಿ ಇದು ಹೆಚ್ಚಾಗುತ್ತಿದೆ. ಇಂತಹ ಸಂದರ್ಭದಲ್ಲಿ ಸಾಧ್ಯವದಷ್ಟು ಎಚ್ಚರದಿಂದ ಇರುವುದು ಒಳ್ಳೆಯದು.

ಸಿಮ್ ಯಾರಿಗೂ ಕೊಡಬೇಡಿ:

ನಿಮ್ಮ ಕ್ರೆಡಿಟ್ ಕಾರ್ಡ್- ಡೆಬಿಟ್ ಕಾರ್ಡ್‌ಗಳನ್ನು ಯಾರಿಗೂ ನೀಡದ ಮಾದರಿಯಲ್ಲಿಯೇ ಸಿಮ್ ಕಾರ್ಡ್ ಅನ್ನು ಯಾರಿಗೂ ನೀಡಬೇಡಿ. ಮೊಬೈಲ್ ರಿಪೇರಿಗೆ ನೀಡುವ ಸಂದರ್ಭದಲ್ಲಿ ಸಿಮ್ ತೆಗೆದಿಟ್ಟುಕೊಳ್ಳುವುದು ಉತ್ತಮ. ನಿಮ್ಮ ಸಿಮ್ ಕಾರ್ಡ್ ಒಮ್ಮೆ ವಂಚಕರ ಕೈಗೆ ಸಿಕ್ಕರೆ ನೀವು ಭಾರೀ ನಷ್ಟವನ್ನು ಅನುಭವಿಸಬೇಕಾಗುತ್ತದೆ.