ಭಾರತದಲ್ಲಿ ಈ ವರ್ಷ ಅತಿ ಹೆಚ್ಚು ಸೌಂಡ್‌ ಮಾಡಿದ ಸ್ಮಾರ್ಟ್‌ವಾಚ್‌ಗಳು!

ಹೌದು, 2022ರಲ್ಲಿ ಸ್ಮಾರ್ಟ್‌ವಾಚ್ ಬಳಕೆದಾರರ ಸಂಖ್ಯೆ ಗಣನೀಯ ಪ್ರಮಾಣದಲ್ಲಿ ಏರಿಕೆಯಾಗಿದೆ. ಹೆಲ್ತ್‌ ಫಿಟ್ನೆಸ್‌ ಫೀಚರ್ಸ್‌ ಆಧಾರಿತ ಸ್ಮಾರ್ಟ್‌ವಾಚ್‌ಗಳ ಕಾರಣಕ್ಕೆ ಈ ಪರಿಯ ಬೆಳವಣಿಗೆ ಸಾಧ್ಯವಾಗಿದೆ ಎಂದು ಹೇಳಲಾಗ್ತಿದೆ. ಅದರಲ್ಲೂ ಕೈಗೆಟಕುವ ಬೆಲೆಯ ಸ್ಮಾರ್ಟ್‌ವಾಚ್‌ಗಳು ಮಾರುಕಟ್ಟೆಯಲ್ಲಿ ಹೊಸ ಅಲೆಯನ್ನೇ ಸೃಷ್ಟಿಸಿವೆ. ಇದರಲ್ಲಿ ಶಿಯೋಮಿ, ಒನ್‌ಪ್ಲಸ್‌, ನಾಯ್ಸ್‌, ಫೈರ್‌ ಬೋಲ್ಟ್‌ ಬ್ರ್ಯಾಂಡ್‌ಗಳ ವಾಚ್‌ಗಳು ಕೂಡ ಸೇರಿವೆ. ಹಾಗಾದ್ರೆ ಈ ವರ್ಷ ಭಾರತದಲ್ಲಿ ಸಂಚಲನ ಸೃಷ್ಟಿಸಿದ ಪ್ರಮುಖ ಸ್ಮಾರ್ಟ್‌ವಾಚ್‌ಗಳ ವಿವರವನ್ನು ಈ ಲೇಖನದಲ್ಲಿ ತಿಳಿಯೋಣ ಬನ್ನಿರಿ.

ಒನ್‌ಪ್ಲಸ್‌ ನಾರ್ಡ್‌ ವಾಚ್

ಭಾರತದಲ್ಲಿ ಈ ವರ್ಷ ಕೈ ಗೆಟಕುವ ಬೆಲೆಯಲ್ಲಿ ಸಾಕಷ್ಟು ಸೌಂಡ್‌ ಮಾಡಿದ ಸ್ಮಾರ್ಟ್‌ವಾಚ್‌ ಎಂದರೆ ಒನ್‌ಪ್ಲಸ್‌ ನಾರ್ಡ್‌ ವಾಚ್‌ ಆಗಿದೆ. ಈ ಸ್ಮಾರ್ಟ್‌ವಾಚ್‌ 4,999ರೂ. ಬೆಲೆಯಲ್ಲಿ ಲಭ್ಯವಿದೆ. ಒನ್‌ಪ್ಲಸ್‌ ನಾರ್ಡ್‌ವಾಚ್‌ 1.78 ಇಂಚಿನ HD ಅಮೋಲೆಡ್‌ ಡಿಸ್‌ಪ್ಲೇ ಹೊಂದಿದೆ. ಈ ಡಿಸ್‌ಪ್ಲೇ 368x448 ಪಿಕ್ಸೆಲ್‌ ಸ್ಕ್ರೀನ್‌ ರೆಸಲ್ಯೂಶನ್‌ ಸಾಮರ್ಥ್ಯವನ್ನು ಪಡೆದಿದೆ. ಈ ಸ್ಮಾರ್ಟ್‌ವಾಚ್‌ 30 ದಿನಗಳ ಸ್ಟ್ಯಾಂಡ್‌ಬೈ ಟೈಂ ಜೊತೆಗೆ 10 ದಿನಗಳ ಬ್ಯಾಟರಿ ಅವಧಿಯನ್ನು ನೀಡುತ್ತದೆ. ಇದು SpO2, ಹೃದಯ ಬಡಿತ, ಒತ್ತಡ ಮಾನಿಟರ್ ಅನ್ನು ಒಳಗೊಂಡಿದೆ.

ರಿಯಲ್‌ಮಿ ವಾಚ್ 3

ಮಾರುಕಟ್ಟೆಯಲ್ಲಿ ಹೊಸ ಅಲೆಯನ್ನೇ ಸೃಷ್ಟಿಸಿದ ಸ್ಮಾರ್ಟ್‌ವಾಚ್‌ಗಳಲ್ಲಿ ರಿಯಲ್‌ಮಿ ವಾಚ್‌ 3 ಸೇರಿದೆ. ಈ ಸ್ಮಾರ್ಟ್‌ವಾಚ್‌ ಐಫೋನ್‌ನೊಂದಿಗೆ ಕೂಡ ಉತ್ತಮವಾಗಿ ಕಾರ್ಯನಿರ್ವಹಿಸಲಿದೆ. ಇದರಲ್ಲಿ ಬಳಕೆದಾರರು ಐಫೋನ್ ಅನ್ನು ಬ್ಲೂಟೂತ್ ಮೂಲಕ ಕನೆಕ್ಟ್‌ ಮಾಡುವ ಮೂಲಕ ಕಾಲ್‌ಗಳನ್ನು ರಿಸಿವ್‌ ಮಾಡುವುದಕ್ಕೆ ಅವಕಾಶವಿದೆ. ಇದು7-ದಿನದ ಬ್ಯಾಟರಿ ಅವಧಿಯನ್ನು ನೀಡಲಿದೆ. ಪ್ರಸ್ತುತ ಭಾರತದಲ್ಲಿ ಇದರ ಬೆಲೆ 3,499ರೂ. ಆಗಿದೆ.

ಅಮಾಜ್‌ಫಿಟ್ ಬಿಪ್ 3

ಅಮಾಜ್‌ಫಿಟ್‌ ಬಿಪ್ 3 ಸ್ಮಾರ್ಟ್‌ವಾಚ್‌ ಬಜೆಟ್‌ ಬೆಲೆಯಲ್ಲಿ ದೊರೆಯುವ ಸ್ಮಾರ್ಟ್‌ವಾಚ್‌ ಆಗಿದೆ. ಈ ಸ್ಮಾರ್ಟ್‌ವಾಚ್‌ 10 ದಿನಗಳ ಬ್ಯಾಟರಿ ಬಳಕೆಯನ್ನು ನೀಡುತ್ತದೆ. ಈ ಸ್ಮಾರ್ಟ್‌ವಾಚ್‌ ಅತ್ಯುತ್ತಮ ಡಿಸ್‌ಪ್ಲೇಯನ್ನು ಹೊಂದಿದೆ. ಇದು ಸ್ಲೀಪ್ ಟ್ರ್ಯಾಕರ್, ಹೃದಯ ಬಡಿತ, SpO2 ಮತ್ತು ಮಲ್ಟಿ ಸ್ಪೋರ್ಟ್ಸ್‌ ಮೋಡ್‌ಗಳನ್ನು ಒಳಗೊಂಡಿದೆ. ಈ ಸ್ಮಾರ್ಟ್‌ವಾಚ್‌ ಸದ್ಯ ಭಾರತದಲ್ಲಿ 3,499 ರೂ.ಬೆಲೆಯಲ್ಲಿ ದೊರೆಯಲಿದೆ.

ರೆಡ್ಮಿ ವಾಚ್ 2 ಲೈಟ್

ಶಿಯೋಮಿ ರೆಡ್ಮಿ ಬ್ರ್ಯಾಂಡ್‌ನ ಈ ಸ್ಮಾರ್ಟ್‌ವಾಚ್‌ ಬಜೆಟ್‌ ಬೆಲೆಯ ವಾಚ್‌ಗಳಲ್ಲಿ ಅತ್ಯುತ್ತಮ ಆಯ್ಕೆಯಾಗಿದೆ. ಈ ಸ್ಮಾರ್ಟ್‌ವಾಚ್‌ ನಿರಂತರವಾದ SpO2 ಟ್ರ್ಯಾಕರ್, ಒತ್ತಡ ಮತ್ತು ನಿದ್ರೆಯ ಮಾನಿಟರಿಂಗ್, 5ATM ವಾಟರ್‌ ರೆಸಿಸ್ಟೆನ್ಸ್‌, 120+ ವಾಚ್ ಫೇಸ್‌ಗಳು ಮತ್ತು ಋತುಚಕ್ರ ಅವಧಿಯನ್ನು ಟ್ರ್ಯಾಕ್‌ ಮಾಡಲಿದೆ. ಇದಲ್ಲದೆ ಈ ಸ್ಮಾರ್ಟ್‌ವಾಚ್‌ ಮಲ್ಟಿ ಕಲರ್‌ ಆಯ್ಕೆಗಳಲ್ಲಿ ಕೂಡ ದೊರೆಯಲಿದೆ. ಪ್ರಸ್ತುತ ಭಾರತದಲ್ಲಿ ಇದರ ಬೆಲೆ 3,499 ರೂ. ಆಗಿದೆ.

ಫೈರ್-ಬೋಲ್ಟ್ ರಿಂಗ್ 3

ಫೈರ್-ಬೋಲ್ಟ್ ರಿಂಗ್ 3 ಸ್ಮಾರ್ಟ್‌ವಾಚ್‌ ಕೂಡ ಬ್ಲೂಟೂತ್ ಕಾಲಿಂಗ್‌ ಫೀಚರ್ಸ್‌ ಅನ್ನು ಬೆಂಬಲಿಸಲಿದೆ. ಈ ಸ್ಮಾರ್ಟ್‌ವಾಚ್‌ ಮಲ್ಟಿ ವಾಚ್‌ಫೇಸ್‌ಗಳನ್ನು ನೀಡಲಿದೆ. ಇದರಲ್ಲಿ ಡಯಲ್ ಅನ್ನು ತಿರುಗಿಸುವ ಮೂಲಕ ಬಳಕೆದಾರರು ವಾಲ್‌ಪೇಪರ್ ಅಥವಾ ವಾಚ್ ಫೇಸ್ ಅನ್ನು ಬದಲಾಯಿಸುವುದಕ್ಕೆ ಅವಕಾಶವಿದೆ. ಇನ್ನು ಈ ಸ್ಮಾರ್ಟ್‌ವಾಚ್‌ ಇನ್‌ಬಿಲ್ಟ್‌ ಕ್ಯಾಲ್ಕುಲೇಟರ್ ಮತ್ತು ಗೇಮ್ಸ್‌, SpO2 ಮತ್ತು ಹಾರ್ಟ್‌ಬೀಟ್‌ ಮಾನಿಟರಿಂಗ್ ಅನ್ನು ಒಳಗೊಂಡಿದೆ. ಈ ಸ್ಮಾರ್ಟ್‌ವಾಚ್‌ ಪ್ರಸ್ತುತ 2,999ರೂ. ಬೆಲೆಯಲ್ಲಿ ಲಭ್ಯವಾಗಲಿದೆ.