ಇದೇ ಫೆ.1 ರಿಂದ ಈ ಸ್ಮಾರ್ಟ್‌ಫೋನ್‌ಗಳಲ್ಲಿ ವಾಟ್ಸಪ್ ಸೇವೆ ಇರಲ್ಲ!

ಹೌದು, ಫೇಸ್‌ಬುಕ್ ಮಾಲೀಕತ್ವದ ವಾಟ್ಸಪ್, ಇದೇ ಫೆಬ್ರುವರಿ 1, 2020ರಿಂದ ಕೆಲವು ಹಳೆಯ ಓಎಸ್‌ ಆಧಾರಿತ ಆಂಡ್ರಾಯ್ಡ್‌ ಮತ್ತು ಐಫೋನ್‌ಗಳಲ್ಲಿ ಕಾರ್ಯನಿರ್ವಹಿಸುವುದಿಲ್ಲ ಎಂದು ಹೇಳಿದೆ. ವಾಟ್ಸಪ್ ಬಳಕೆದಾರರ ಖಾಸಗಿತನದ ಸುರಕ್ಷತೆ ಹಾಗೂ ಮಾಹಿತಯ ಭದ್ರತೆಯ ಉದ್ದೇಶದಿಂದ ಈ ನಿರ್ಧಾರ ಕೈಗೊಳ್ಳಲಾಗಿದೆ ಎಂದು ಸಂಸ್ಥೆಯು ಹೇಳಿಕೊಂಡಿದೆ. ಇದೇ ಜನವರಿ 1, 2020ರಿಂದ ವಿಂಡೊಸ್ ಓಎಸ್‌ ಸ್ಮಾರ್ಟ್‌ಫೋನ್‌ಗಳಲ್ಲಿ ವಾಟ್ಸಪ್ ಸೇವೆ ನಿಲ್ಲಿಸಿದೆ.

ಇದೇ ಜನವರಿ 31, 2020 ಕೆಲವು ಹಳೆಯ ಓಎಸ್‌ ಹೊಂದಿರುವ ಸ್ಮಾರ್ಟ್‌ಫೋನ್‌ಗಳಲ್ಲಿ ವಾಟ್ಸಪ್ ಸೇವೆಯ ಕೊನೆಯ ದಿನವಾಗಲಿದೆ. ಆಂಡ್ರಾಯ್ಡ್‌ ಆಪರೇಟಿಂಗ್ ಸಿಸ್ಟಂ 2.3.7 ಹಾಗೂ ಅದಕ್ಕಿಂತಲೂ ಹಿಂದಿನ ಓಎಸ್‌ ಆಧಾರಿತ ಆವೃತ್ತಿಗಳಲ್ಲಿ ವಾಟ್ಸಪ್ ಇನ್ಮುಂದೆ ಕೆಲಸ ಮಾಡುವುದಿಲ್ಲ. ಅದೇ ರೀತಿ ಐಓಎಸ್-IOS 8 ಹಾಗೂ ಅದಕ್ಕಿಂತಲೂ ಹಿಂದಿನ ಓಎಸ್‌ ಆಧಾರಿತ ಐಫೋನ್‌ಗಳಲ್ಲಿಯೂ ಸಹ ವಾಟ್ಸಪ್ ಆಪ್ ಸೇವೆ ಇಲ್ಲವಾಗಲಿದೆ. ಈ ಸ್ಮಾರ್ಟ್‌ಫೋನ್‌ಗಳಲ್ಲಿ ಹೊಸ ವಾಟ್ಸಪ್ ಖಾತೆ ತೆರೆಯಲು ಬೆಂಬಲ ಇರಲ್ಲ.

ಸರಳ ಕಾರ್ಯವೈಖರಿ, ಅತ್ಯುತ್ತಮ ಫೀಚರ್ಸ್‌ ಹಾಗೂ ಅಗತ್ಯ ಮಲ್ಟಿಮೀಡಿಯಾ ಸೌಲಭ್ಯ ಸೇರಿದಂತೆ ವಾಯಿಸ್‌ ಕಾಲ್, ಗ್ರೂಪ್ ಕಾಲ್‌ ಸೌಲಭ್ಯಗಳಿಂದ ವಾಟ್ಸಪ್ ಸಿಕ್ಕಾಪಟ್ಟೆ ಜನಪ್ರಿಯತೆ ಗಳಿಸಿದೆ. ಪ್ರಸ್ತುತ ಭಾರತದಲ್ಲಿ ಸುಮಾರು 400 ಮಿಲಿಯನ್ ಸಕ್ರಿಯ ಬಳಕೆದಾರರನ್ನು ಹೊಂದಿದೆ. ಬಳಕೆದಾರರ ಖಾಸಗಿ ಮಾಹಿತಿಗಳ ಸುರಕ್ಷತೆಯ ದೃಷ್ಠಿಯಿಂದ ಹಳೆಯ ಆವೃತ್ತಿಯಲ್ಲಿ ಸೇವೆ ನಿಲ್ಲಿಸಲಿದೆ.

ಇದೇ ಜನವರಿ 1, 2020 ರಿಂದ ವಿಂಡೊಸ್ ಓಎಸ್‌ ಬೆಂಬಲಿತ ಫೋನ್‌ಗಳಲ್ಲಿ ವಾಟ್ಸಪ್ ಯುಗಾಂತ್ಯವಾಗಲಿದೆ ಎಂದು ಕಳೆದ ತಿಂಗಳು ಸಂಸ್ಥೆಯು ತಿಳಿಸಿತ್ತು. ಹಾಗೂ ಮೈಕ್ರೋಸಾಫ್ಟ್ ಸ್ಟೋರ್‌ನಿಂದ ವಾಟ್ಸಪ್‌ ಆಪ್‌ ಸಹ ತೆಗೆದುಹಾಕುವುದಾಗಿ ತಿಳಿಸಿತ್ತು. ಹೀಗಾಗಿ ವಿಂಡೊಸ್‌ ಓಎಸ್‌ನಲ್ಲಿಗ ವಾಟ್ಸಪ್ ಸಪೋರ್ಟ್‌ ಇಲ್ಲ. ಅದೇ ಹಾದಿಯಲ್ಲಿ ಈಗ ಕೆಲ ಹಳೆಯ ಆಂಡ್ರಾಯ್ಡ್‌ ಮತ್ತು ಐಓಎಸ್‌ ಫೋನ್‌ಗಳಿಗೂ ಬೆಂಬಲ ನಿಲ್ಲಿಸುವುದಾಗಿ ಹೇಳಿದೆ.