ಇನ್​​​ಸ್ಟಾಗ್ರಾಂನಲ್ಲಿ ವಿಶ್ವ ದಾಖಲೆ ಸೃಷ್ಟಿಸಿದ ಈತ ಯಾರು ಗೊತ್ತೇ?

ಪ್ರಖ್ಯಾತ ಚಿತ್ರ ಜಾಲತಾಣ ಇನ್​​​ಸ್ಟಾಗ್ರಾಂನಲ್ಲಿ ಕೊರಿಯನ್​​-ಪಾಪ್​ ಸ್ಟಾರ್​ ಕಾಂಗ್​ ಡೇನಿಯಲ್ ಅವರು ಹೊಸದೊಂದು ವಿಶ್ವ ದಾಖಲೆ ಬರೆದಿದ್ದಾರೆ. ಇನ್​​​ಸ್ಟಾಗ್ರಾಂ ಖಾತೆ ತೆರೆದ ಕಾಂಗ್ ಡೇನಿಯಲ್​​​​​​ ಅವರು ಕೆಲವೇ ಗಂಟೆಗಳಲ್ಲಿ 10 ಲಕ್ಷ ಫಾಲೋವರ್ಸ್​​ ಪಡೆದು, ಅತೀ ಕಡಿಮೆ ಅವಧಿಯಲ್ಲಿ 10 ಲಕ್ಷ ಇನ್​​ಸ್ಟಾಗ್ರಾಂ ​ಫಾಲೋವರ್ಸ್​ ಪಡೆದ ಸೆಲೆಬ್ರಿಟಿ ಎಂಬ ಖ್ಯಾತಿ ಪಡೆದಿದ್ದಾರೆ.

ಹೌದು, ಹೊಸ ವರ್ಷದ ದಿನವಷ್ಟೇ ಹೊಸದಾಗಿ ಇನ್​​​ಸ್ಟಾಗ್ರಾಂ ಖಾತೆ ತೆರೆದ ಡೇನಿಯಲ್​​​​​​ ಕೆಲವೇ ಗಂಟೆಗಳಲ್ಲಿ 10 ಲಕ್ಷ ಫಾಲೋವರ್ಸ್​​ ಪಡೆದು ವಿಶ್ವ ದಾಖಲೆಯನ್ನು ತಮ್ಮ ಹೆಸರಿಗೆ ಬರೆಸಿಕೊಂಡಿದ್ದಾರೆ. ಈ ಮೂಲಕ ಕೇವಲ 12 ಗಂಟೆಗಳಲ್ಲಿ 10 ಲಕ್ಷ ಫಾಲೋವರ್​​ಗಳನ್ನ ಪಡೆದಿದ್ದ​ ಪೋಪ್​ ಫ್ರಾನ್ಸಿಸ್​ ಅವರ ದಾಖಲೆಯನ್ನು ಕಾಂಗ್​ ಡೇನಿಯಲ್ ಅವರು ಅಳಿಸಿಹಾಕಿದ್ದಾರೆ.

2016ರಲ್ಲಿ ಪೋಪ್​​ ಫ್ರಾನ್ಸಿಸ್​​ ಅವರ ಹೆಸರಿನ ಖಾತೆ​​​ ಕೇವಲ 12 ಗಂಟೆಗಳಲ್ಲಿ 10 ಲಕ್ಷ ಫಾಲೋವರ್​​ಗಳನ್ನ ಪಡೆದಿದ್ದು ಇಲ್ಲಿಯವರೆಗಿನ ದಾಖಲೆಯಾಗಿತ್ತು. ಆದರೆ, ಈಗ ​​ಪಾಪ್​ ಸ್ಟಾರ್ ಡೇನಿಯಲ್​ ಪೋಪ್​ ಫ್ರಾನ್ಸಿಸ್​ ಅವರು ಇನ್​​​ಸ್ಟಾಗ್ರಾಂ ಖಾತೆ ತೆರೆದ ಕೇವಲ 11 ಗಂಟೆ 36 ನಿಮಿಷಗಳಲ್ಲಿ 10 ಲಕ್ಷ ಇನ್​​ಸ್ಟಾಗ್ರಾಂ ​ಫಾಲೋವರ್ಸ್​ ಪಡೆದು ಹೊಸ ವಿಶ್ವ ದಾಖಲೆ ಬರೆದಿದ್ದಾರೆ.

22 ವರ್ಷದ ಕೊರಿಯನ್​​-ಪಾಪ್​ ಸ್ಟಾರ್​ ಕಾಂಗ್ ಡೇನಿಯಲ್​​ ಜನವರಿ 1ರಂದು ರಾತ್ರಿ 10 ಗಂಟೆಗೆ ಸೆಲ್ಫಿಯೊಂದನ್ನು ಪೋಸ್ಟ್​ ಮಾಡಿ ಹೆಲೋ ಎಂದು ಬರೆದಿದ್ದರು. ಜನವರಿ 2ರಂದು ಬೆಳಗ್ಗೆ 9.36ರ ವೇಳೆಗೆ ಡೇನಿಯಲ್ ಅವ​​​ರನ್ನು 10 ಲಕ್ಷ ಜನ ಫಾಲೋ ಮಾಡಿದ್ದಾಗಿ ತಿಳಿದುಬಂದಿದೆ. ಅಂದರೆ ಕೇವಲ 11 ಗಂಟೆ 36 ನಿಮಿಷಗಳಲ್ಲಿ ಡೇನಿಯಲ್​​​ 10 ಲಕ್ಷ ಫಾಲೋವರ್ಸ್​ ಪಡೆದಿದ್ದಾರೆ.

ದಕ್ಷಿಣ ಕೊರಿಯಾದ ಟ್ಯಾಲೆಂಟ್​ ಶೋ ಪ್ರೊಡ್ಯೂಸ್​ 101 ಮೂಲಕ ಬೆಳಕಿಗೆ ಬಂದ 'Wanna One' ಎಂಬ 11 ಜನರ ಬ್ಯಾಂಡ್​​ನಲ್ಲಿದ್ದ ಕಾಂಗ್​ ಡೇನಿಯಲ್ ಅವರು ಅತ್ಯಂತ ಕಡಿಮೆ ಸಮಯದಲ್ಲಿ ಹೆಚ್ಚು​​ ಜನಪ್ರಿಯತೆ ಗಳಿಸಿದ್ದರು. ಇನ್​ಸ್ಟಾಗ್ರಾಂನಲ್ಲಿ ಈವರೆಗೆ ಡೇನಿಯಲ್​​ ಹಲವಾರು ಸೆಲ್ಫಿ ಹಾಗೂ ತನ್ನ ಬೆಕ್ಕಿನ ವಿಡಿಯೋಗಳನ್ನ ಹಂಚಿಕೊಂಡಿದ್ದು, ಲಕ್ಷಾಂತರ ಲೈಕ್ಸ್ ಕೂಡ​ ಗಿಟ್ಟಿಸಿದ್ದಾರೆ.