ನ್ಯೂಸ್‌ ಆಂಕರ್‌ಗಳ ಸ್ಥಾನಕ್ಕೂ ಬಂತು ಕುತ್ತು..! ಚೀನಾದಲ್ಲಿ ಲಾಂಚ್‌ ಆಯ್ತು ಆಂಕರ್‌ ರೋಬೋಟ್‌..!

ಹೇಗಿರುತ್ತಾನೆ AI ಆಂಕರ್‌..?

AI ಆಂಕರ್ ತದ್ರೂಪಿ ಮನುಷ್ಯನ ರೂಪವನ್ನು ಹೊಂದಿದ್ದು, ಮಾನವನ ಆಕಾರವನ್ನೇ ಹೋಲುತ್ತಾನೆ. ಇದು ಕೃತಕ ಬುದ್ಧಿಮತ್ತೆ ಬೆಂಬಲಿತ ರೋಬೋಟ್‌ ಆಗಿದೆ. AI ಆಂಕರ್‌ನಲ್ಲಿ ಸುದ್ದಿ ನಿರೂಪಕನಲ್ಲಿರುವ ಕನಿಷ್ಟ ಮುಖದ ಅಭಿವ್ಯಕ್ತಿಗಳು ಮತ್ತು ತುಟಿ ಚಲನೆಗಳು ಇದ್ದು, ಸುದ್ದಿಯನ್ನು ನಿರೂಪಕನಂತೆ ಸ್ಪಷ್ಟವಾಗಿ ಓದುತ್ತದೆ. ಸದ್ಯಕ್ಕೆ ಇಂಗ್ಲಿಷ್ ಮತ್ತು ಚೀನಾ ಭಾಷೆಯಲ್ಲಿ ಸುದ್ದಿಯನ್ನು AI ಆಂಕರ್‌ ಓದುತ್ತಿದೆ.

ಅಂತರ್ಜಾಲ ಸಮ್ಮೇಳನದಲ್ಲಿ ಬಿಡುಗಡೆ

ಚೀನಾದ ವುಜೆನ್‌ನಲ್ಲಿ ಆಯೋಜಿಸಿದ್ದ ವಿಶ್ವ ಅಂತರ್ಜಾಲ ಸಮ್ಮೇಳನದಲ್ಲಿ ಶಿನೂವಾ ಈ AI ಆಂಕರ್‌ನ್ನು ಬಿಡುಗಡೆಗೊಳಿಸಿದೆ. ಸರ್ಚ್‌ ಇಂಜಿನ್‌ ಆಪರೇಟರ್‌ ಸೋಗು ಜತೆ ಶಿನೂವಾ ಈ ತಂತ್ರಜ್ಞಾನವನ್ನು ಗುರುವಾರ ಬಿಡುಗಡೆಗೊಳಿಸಿದೆ ಎಂದು ಸೌತ್‌ ಚೀನಾ ಮಾರ್ನಿಂಗ್‌ ಪೋಸ್ಟ್‌ ವರದಿ ಮಾಡಿದೆ.

ಸ್ವಯಂ ಪರಿಚಯ ಮಾಡಿಕೊಂಡ ವರ್ಚುವಲ್‌ ಆಂಕರ್‌

ಶಿನೂವಾದ ಮೊದಲ ಇಂಗ್ಲಿಷ್‌ AI ಆಂಕರ್‌ ಸ್ವಯಂ ಪರಿಚಯ ಮಾಡಿಕೊಂಡಿದ್ದಲ್ಲದೇ, ತನ್ನ ಸಾಮರ್ಥ್ಯಗಳನ್ನು ವಿವರಿಸಿದೆ. AI ಆಂಕರ್‌ ಮುಖ ಮತ್ತು ಧ್ವನಿಯ ವಿನ್ಯಾಸವನ್ನು ಏಜೆನ್ಸಿಯ ಸುದ್ದಿ ನಿರೂಪಕ ಝಾಂಗ್‌ಝಾವ್‌ ಅವರನ್ನು ಆಧರಿಸಿ ರೂಪಿಸಲಾಗಿದೆ. ಇದು ಟೆಲೆಪ್ರಾಮ್ಟರ್‌ನಲ್ಲಿ ಬರುವ ಸುದ್ದಿಯನ್ನು ಓದುತ್ತದೆ.

ಟೆಕ್‌ ಲೋಕದ ಹೊಸ ಭರವಸೆ

AI ನ್ಯೂಸ್‌ ಆಂಕರ್‌ ದಣಿವರಿಯದೇ ಕೆಲಸ ಮಾಡುವ ಹಾಗೂ ಯಾವುದೇ ಅಡಚಣೆಗಳಿಲ್ಲದ ಸುದ್ದಿಯನ್ನು ಓದುವ ಭರವಸೆ ಟೆಕ್‌ ಲೋಕಕ್ಕೆ ಸಿಕ್ಕಿದೆ. ಇದರ ಜತೆ AI ಆಂಕರ್‌ ಮಾಹಿತಿಯನ್ನು ಸಂಗ್ರಹಿಸಿ ಸುದ್ದಿಯನ್ನು ಅಭಿವೃದ್ಧಿಪಡಿಸುತ್ತದೆ. ಲೈವ್‌ ಬ್ರಾಡ್‌ಕಾಸ್ಟಿಂಗ್‌ ವಿಡಿಯೋವನ್ನು ನೀಡುವುದನ್ನು ಕಲಿಯುತ್ತಿದ್ದಾನೆ. ಈ ವೃತ್ತಿಪರ ಸುದ್ದಿ ನಿರೂಪಕರು ಓದುವಂತೆ ನೈಸರ್ಗಿಕವಾಗಿ AI ಆಂಕರ್‌ನ್ನು ರೂಪಿಸಲಾಗಿದೆ ಎಂದು ಶಿನುವಾ ಹೇಳಿದೆ.

24/7 ಕೆಲಸ

ಶಿನೂವಾ ಹೇಳುವಂತೆ AI ಆಂಕರ್‌ ಹೀಗಾಗಲೇ ಏಜೆನ್ಸಿಯ ರಿಪೋರ್ಟಿಂಗ್‌ ತಂಡದ ಸದಸ್ಯನಾಗಿದ್ದಾನಂತೆ. ಅವನು 24 ಗಂಟೆ ನಿರಂತರವಾಗಿ ಕೆಲಸವನ್ನು ಮಾಡುತ್ತಿದ್ದು, ನ್ಯೂಸ್‌ ವೆಬ್‌ಸೈಟ್‌ ಹಾಗೂ ಸಾಮಾಜಿಕ ಜಾಲತಾಣಗಳಲ್ಲಿ ಕಾರ್ಯನಿರ್ವಹಿಸುತ್ತಿದೆ. ಇದರಿಂದ ನ್ಯೂಸ್‌ ಪ್ರೊಡಕ್ಷನ್‌ ವೆಚ್ಚವನ್ನು ಕಡಿಮೆ ಮಾಡಬಹುದು ಮತ್ತು ಸುದ್ದಿಯ ದಕ್ಷತೆಯನ್ನು ಹೆಚ್ಚಿಸಬಹುದಾಗಿದೆಯಂತೆ.

ಅಭಿವೃದ್ಧಿ ಹೊಂದುತ್ತಿರುವ ತಂತ್ರಜ್ಞಾನ

Ai ಆಂಕರ್‌ ಸೃಷ್ಟಿಸಿರುವ ದಿನದಿಂದಲೂ ಸುದ್ದಿಗಳನ್ನು ನಿರೂಪಿಸುತ್ತಿದೆ. ಆದರೆ, ಒಂದೇ ಧ್ವನಿಯಲ್ಲಿ ಯಾವುದೇ ಏರಿಳಿತವಿಲ್ಲದೇ, ಮುಖದಲ್ಲಿ ಭಾವನೆಗಳಿಲ್ಲದ ರೀತಿಯಲ್ಲಿ ನ್ಯೂಸ್‌ ಹೇಳುತ್ತಿತ್ತು. ಸದ್ಯ ಸ್ವಲ್ಪ ಅಭಿವೃದ್ಧಿಯಾಗಿದ್ದು, ಇನ್ನು ಅನೇಕ ಅಭಿವೃದ್ಧಿಗಳು AI ಆಂಕರ್‌ಗೆ ಬೇಕಾಗಿದ್ದು, ಮುಂದೊಂದು ದಿನ ವಿಶ್ವ ಟಿವಿ ಮಾಧ್ಯಮವನ್ನು AI ಆಂಕರ್‌ ಆಳಿದರೆ ಆಶ್ಚರ್ಯಪಡಬೇಕಿಲ್ಲ.