'ಫ್ಲಿಪ್​ಕಾರ್ಟ್' ಡೆಲಿವರಿ ಬಾಯ್​ಗೆ ಯಾಮಾರಿಸಿದ ಪ್ರಳಯಾಂತಕರು!

ಇಷ್ಟು ದಿನ ಆನ್‌ಲೈನ್ ಗ್ರಾಹಕರಿಗೆ ಡೆಲಿವರಿ ಬಾಯ್‌ಗಳು ವಂಚಿಸಿದ ಪ್ರಕರಣಗಳ ಬಗ್ಗೆ ಕೇಳಿರುತ್ತೀರಾ. ಆದರೆ, ಡೆಲಿವರಿ ಬಾಯ್​ಗೆ ಯಾಮಾರಿಸಿದ ಪ್ರಳಯಾಂತಕರ ಬಗ್ಗೆ ದೂರು ದಾಖಲಾಗಿರುವ ಘಟನೆ ಬುಧವಾರ ನಡೆದಿದೆ. ಮೊಬೈಲ್ ಅನ್ನು ಡೆಲಿವರಿ ಮಾಡಲು ಬಂದಿದ್ದ ಫ್ಲಿಪ್​ಕಾರ್ಟ್​ ಶಾಪಿಂಗ್​ನ ಡೆಲಿವರಿ ಬಾಯ್​ಗೆ ಬೆಂಗಳೂರಿನಲ್ಲಿ ವಂಚನೆ ಮಾಡಲಾಗಿದೆ.

ಹೌದು, ಆನ್​ಲೈನ್​ನಲ್ಲಿ ಬುಕ್ ಮಾಡಿದಾಗ ಕೆಲವೊಮ್ಮೆ ಪಾರ್ಸಲ್​ನಲ್ಲಿ ಆರ್ಡರ್ ಮಾಡಿದ ವಸ್ತುವಿನ ಬದಲಾಗಿ ಕಲ್ಲು, ಕಟ್ಟಿಗೆ, ಪೇಪರ್ ತುಂಬಿ ಕಳುಹಿಸುವುದನ್ನು ನೋಡಿದ್ದೇವೆ. ಆದರೆ, ಇಲ್ಲಿ ಕಥೆಯೇ ಬೇರೆಯಾಗಿದ್ದು, ಗ್ರಾಹಕರೇ ಡೆಲಿವರಿ ಬಾಯ್​ಗೆ ಯಾಮಾರಿಸಿದ್ದಾರೆ. ಹೀಗೇ ಯಾಮಾರಿಸಲೆಂದೇ ಡೆಲಿವರಿಗೆ ನೀಡಿದ್ದ ಮನೆಯ ವಿಳಾಸವನ್ನೂ ಮರೆಮಾಚಿ ಕೃತ್ಯವೆಸಗಿದ್ದಾರೆ.

ಘಟನೆ ವಿವರ ಹೀಗಿದ್ದು, ರಾಹುಲ್ ಎಂಬ ಹೆಸರಿನಲ್ಲಿ ಫ್ಲಿಪ್ಕಾರ್ಟ್ ನಲ್ಲಿ 50 ಸಾವಿರ ರೂ. ಬೆಲೆಯ ಐಫೋನ್ ಬುಕ್ ಮಾಡಲಾಗಿದೆ. ಡೆಲಿವರಿ ಬಾಯ್​ ಎಂದಿನಂತೆ ಮೊಬೈಲ್​ ಡೆಲಿವರಿ ಮಾಡಲು ನಮೂದಿಸಲಾಗಿದ್ದ ಆರ್​ಆರ್​ ನಗರದ ಲೊಕೇಶನ್​ಗೆ ಬಂದಿದ್ದಾರೆ. ಈ ವೇಳೆ ಮೊಬೈಲ್ ನೋಡುವ ನೆಪದಲ್ಲಿ ಡೆಲಿವರಿ ಬಾಯ್ ಗಮನ‌ವನ್ನು ಬೇರೆಡೆ ಸೆಳೆದು ವಂಚಿಸಲಾಗಿದೆ.

ಡೆಲಿವರಿ ನೀಡಲು ಹೋದಾಗ ಮೊಬೈಲ್ ತೆಗೆದುಕೊಂಡ ವ್ಯಕ್ತಿ ಅದನ್ನು ನೋಡಿದ ಬಳಿಕ ಹಣ ಕಡಿಮೆ ಇದೆ. ನಂತರ ಕಚೇರಿಯಲ್ಲೇ ಬಂದು ಮೊಬೈಲ್​ ತೆಗೆದುಕೊಳ್ಳುತ್ತೇನೆ ಎಂದು ಹೇಳಿ ಆತನಿಗೆ ವಾಪಸ್​ ಕಳುಹಿಸಿದ್ದಾನೆ. ಬಳಿಕ ಆ ಡೆಲಿವರಿ ಬಾಯ್​ ತನ್ನ ಕಚೇರಿಗೆ ಬಂದು ಬಾಕ್ಸ್ ವಾಪಸ್ ನೀಡಲು ಹೋದಾಗ ಅಲ್ಲಿ ಐಫೋನ್ ಬದಲು ಕಲ್ಲಿಟ್ಟಿರುವುದು ಬೆಳಕಿಗೆ ಬಂದಿದೆ.

ಮನೆಯ ಬಳಿ‌ ಬೇಡ ಶೆಲ್ ಪೆಟ್ರೋಲ್ ಬಂಕ್​ಗೆ ಬರ ಹೇಳಿ ವಿಳಾಸವನ್ನು ತಪ್ಪಿಸಿದ್ದಾರೆ ಎಂದು ಆರೋಪಿಸಲಾಗಿದ್ದು, ಆ ಹೆಸರಿನ ವ್ಯಕ್ತಿ​ ಜತೆ ಇನ್ನಿತರರು ಸೇರಿಕೊಂಡು ವಂಚನೆ ನಡೆಸಿದ್ದಾರೆ ಎಂದು ಹೇಳಲಾಗಿದೆ. ಇದೇ ಮೊದಲ ಬಾರಿಗೆ ಈ ರೀತಿ ಡೆಲಿವರಿ ಬಾಯ್ಗೆ ವಂಚಿಸಿದ ಪ್ರಕರಣ ಇದಾಗಿದ್ದು, ಈ ಸಂಬಂಧ ನಗರದ ಕೆಂಗೇರಿ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.

ಒದಿರಿ: ಸಿಹಿಸುದ್ದಿ..'ರೆಡ್‌ಮಿ ನೋಟ್ 6 ಪ್ರೊ' ಬೆಲೆ ಮತ್ತೊಮ್ಮೆ ಇಳಿಕೆ!