ಹುವಾವೇ ವಾಚ್‌ ಕಿಡ್ಸ್‌ 5X ಅನಾವರಣ; ಮಕ್ಕಳ ಶೈಕ್ಷಣಿಕ ಬೆಳವಣಿಗೆಗೆ ಸಹಕಾರಿ!

ಹೌದು, ಈಗಾಗಲೇ ಹಲವಾರು ರೀತಿಯ ಸ್ಮಾರ್ಟ್‌ಫೋನ್‌ ಹಾಗೂ ಸ್ಮಾರ್ಟ್‌ವಾಚ್‌ಗಳನ್ನು ಮಾರುಕಟ್ಟೆಗೆ ಪರಿಚಯಿಸಿರುವ ಹುವಾವೇ ಈಗ ಹುವಾವೇ ವಾಚ್‌ ಕಿಡ್ಸ್‌ 5X ( Huawei Watch Kids 5X ) ಎಂಬ ವಾಚ್‌ ಅನ್ನು ಅನಾವರಣ ಮಾಡಿದೆ. ಈ ವಾಚ್‌ ಡಿಟ್ಯಾಚೇಬಲ್ ಡ್ಯುಯಲ್ ಸೈಡೆಡ್ ಡಿಸ್‌ಪ್ಲೇ ಆಯ್ಕೆಯನ್ನು ಹೊಂದಿದ್ದು, ಮಕ್ಕಳಿಗೆ ಖಂಡಿತಾ ಇಷ್ಟವಾಗುತ್ತದೆ. ಹಾಗಿದ್ರೆ ಇದರ ಪ್ರಮುಖ ಫೀಚರ್ಸ್‌ ಏನು? ಬೆಲೆ ಎಷ್ಟು ಎಂಬಿತ್ಯಾದಿ ಮಾಹಿತಿಯನ್ನು ಈ ಲೇಖನದಲ್ಲಿ ವಿವರಿಸಿದ್ದೇವೆ ನೋಡಿ.

ಪ್ರಮುಖ ಫೀಚರ್‌

ಈ ಸ್ಮಾರ್ಟ್‌ವಾಚ್‌ ಡ್ಯುಯಲ್ ಡಿಸ್‌ಪ್ಲೇ ಆಯ್ಕೆಯನ್ನು ಪಡೆದುಕೊಂಡಿದ್ದು, ಇದರಲ್ಲಿ ಒಂದು ಬ್ಲಾಕ್‌ ಆಂಡ್ ವೈಟ್‌ ಎಲ್‌ಸಿಡಿ ಡಿಸ್‌ಪ್ಲೇ ಹೊಂದಿದ್ದರೆ ಮತ್ತೊಂದು ಕಲರ್‌ ಡಿಸ್‌ಪ್ಲೇ ಆಯ್ಕೆ ಪಡೆದಿದೆ. ಹೀಗಾಗಿ ಮಕ್ಕಳು ತಮಗೆ ಯಾವುದು ಅನುಕೂಲವೋ ಆ ಡಿಸ್‌ಪ್ಲೇಯನ್ನು ಬಳಕೆ ಮಾಡಬಹುದು.

ಹೆಚ್ಚಿನ ಭದ್ರತಾ ಫೀಚರ್ಸ್

ಇನ್ನು ಈ ವಾಚ್‌ ಅನ್ನು ಮಕ್ಕಳಿಗಾಗಿಯೇ ತಯಾರಿಸಿರುವುದರಿಂದ ಹೆಚ್ಚಿನ ಭದ್ರತಾ ಫೀಚರ್ಸ್‌ಗಳನ್ನು ನೀಡಲಾಗಿದೆ. ಹಾಗೆಯೇ ಈ ವಾಚ್‌ನ ಎರಡೂ ಬದಿಯಲ್ಲೂ ಕ್ಯಾಮೆರಾ ಆಯ್ಕೆ ನೀಡಲಾಗಿದ್ದು, ಈ ಮೂಲಕ ಮಕ್ಕಳು ವಿಡಿಯೋ ಕರೆಗಳನ್ನೂ ಸಹ ಮಾಡಬಹುದಾಗಿದೆ. ಹಾಗೆಯೇ ಈ ಕರೆ ಸೌಲಭ್ಯದಲ್ಲಿ ಯಾರು ಯಾರಿಗೆ ಕರೆ ಮಾಡಬಹುದು ಎಂಬ ಆಯ್ಕೆಯನ್ನು ಪೋಷಕರು ಸೆಟ್‌ ಮಾಡಬಹುದು. ಇದರಿಂದ ಇತರರು ಆ ವಾಚ್‌ಗೆ ಕರೆ ಮಾಡುವುದನ್ನು ನಿಯಂತ್ರಿಸಬಹುದಾಗಿದೆ.

ಸ್ಥಳೀಯ ಜಿಪಿಎಸ್‌ ಆಯ್ಕೆ

ಇದಿಷ್ಟೇ ಅಲ್ಲದೆ ಇದರಲ್ಲಿ ಜಿಪಿಎಸ್‌ ಫೀಚರ್ಸ್‌ ನೀಡಲಾಗಿದ್ದು, ಈ ವಾಚ್‌ ಧರಿಸಿದಾಗ ಮಕ್ಕಳು ಏನಾದರೂ ಕಾಣೆಯಾದರೆ ಅಥವಾ ಜನಸಂದಣಿ ಪ್ರದೇಶದಲ್ಲಿ ಪೋಚಕರು ಮಕ್ಕಳನ್ನು ಕಳೆದುಕೊಂಡರೆ ಈ ಫೀಚರ್ಸ್‌ ಮೂಲಕ ಸುಲಭವಾಗಿ ಹುಡುಕಬಹುದಾಗಿದೆ.

ಶೈಕ್ಷಣಿಕ ಆಪ್‌ಗಳಿಗೆ ಪ್ರವೇಶ

ಇದರೊಂದಿಗೆ ಹುವಾವೇ ತನ್ನದೇ ಆದ ಆಪರೇಟಿಂಗ್‌ ಸಿಸ್ಟಂ ಅನ್ನು ಈ ವಾಚ್‌ನಲ್ಲಿ ಇರಿಸಲಾಗಿದ್ದು, ಈ ಮೂಲಕ ಮಕ್ಕಳು ತಮಗೆ ಬೇಕಾದ ಶೈಕ್ಷಣಿಕ ಸಂಬಂಧದ ಆಪ್‌ಗಳನ್ನು ತೆರೆಯಬಹುದಾಗಿದೆ. ಹಾಗೂ ತಮ್ಮ ಶಿಕ್ಷಣಕ್ಕೆ ಬೆಂಬಲ ನೀಡುವ ಮಾಹಿತಿಗಳನ್ನು ಈ ಮೂಲಕ ಪಡೆದುಕೊಳ್ಳಬಹುದಾಗಿದೆ.

ಮಕ್ಕಳ ಆರೋಗ್ಯ ಮೇಲ್ವಿಚಾರಣೆ

ಇದೆಲ್ಲದರ ಜೊತೆಗೆ ಈ ವಾಚ್‌ ಚಿಕ್ಕಮಕ್ಕಳ ಆರೋಗ್ಯ ಮೇಲ್ವಿಚಾರಣೆ ಕೆಲಸವನ್ನೂ ಮಾಡುತ್ತದೆ. ಮಕ್ಕಳ ಚಲನವಲದ ಹಾಗೂ ಅವರಿಗೆ ಏನಾದರೂ ಆರೋಗ್ಯದಲ್ಲಿ ಏರುಪೇರಾದರೆ ತಕ್ಷಣವೇ ಮಾಹಿತಿ ನೀಡುತ್ತದೆ. ಇದರಿಂದ ಪೋಷಕರು ಎಚ್ಚೆತ್ತುಕೊಳ್ಳಬಹುದು. ಇನ್ನು ಈ ವಾಚ್ ಕಿಡ್ಸ್ 5X ಎಕ್ಸ್ ಕಳೆದ ವರ್ಷ ಹುವಾವೇ ಬಿಡುಗಡೆ ಮಾಡಿದ ವಾಚ್ ಕಿಡ್ಸ್ 4 ಪ್ರೊಗೆ ಉತ್ತರಾಧಿಕಾರಿಯಾಗಿದೆ ಎನ್ನಲಾಗಿದೆ.

ಬೆಲೆ ಹಾಗೂ ಲಭ್ಯತೆ

ಈ ಮಕ್ಕಳ ಸ್ಮಾರ್ಟ್‌ವಾಚ್‌ ಸದ್ಯಕ್ಕೆ ಚೀನಾದಲ್ಲಿ ಮಾತ್ರ ಲಾಂಚ್‌ ಆಗಿದೆ. ಆದರೆ ಚೀನಾವೂ ಸೇರಿದಂತೆ ಜಾಗತಿಕವಾಗಿ ಯಾವಾಗ ಈ ವಾಚ್‌ ಮಾರುಕಟ್ಟೆಯಲ್ಲಿ ಲಭ್ಯವಾಗಲಿದೆ ಹಾಗೂ ಬೆಲೆ ಎಷ್ಟ ಎಂಬಿತ್ಯಾದಿ ಮಾಹಿತಿಯನ್ನು ಇನ್ನೂ ಬಹಿರಂಗಪಡಿಸಿಲ್ಲ. ಅದರಲ್ಲೂ ಚೀನಾದಲ್ಲಿ ಇಂದಿನಿಂದ ಮುಂಗಡ ಬುಕ್ಕಿಂಗ್‌ ಸೌಲಭ್ಯ ಕಲ್ಪಿಸಲಾಗಿದೆ.