ರೈಲ್ವೆ ಆಪ್‌ನಲ್ಲಿ ಅಶ್ಲೀಲ ಜಾಹಿರಾತು ಬಗ್ಗೆ ಟ್ವಿಟ್ ಮಾಡಿ ಮರ್ಯಾದೆ ಕಳೆದುಕೊಂಡ!

ಏನಿದು ವೈರಲ್ ಆಗಿರುವ ಘಟನೆ?

ಆನಂದ ಕುಮಾರ್‌ ಎಂಬ ಯುವಕ ಐಆರ್‌ಸಿಟಿಸಿ ಟಿಕೆಟ್ ಬುಕಿಂಗ್ ಸೈಟ್‌ನಲ್ಲಿ ನಿರಂತರವಾಗಿ ಆಕ್ಷೇಪಾರ್ಹ ಮತ್ತು ಅಶ್ಲೀಲ ಜಾಹೀರಾತುಗಳು ಬರುತ್ತಿವೆ. ಇದರಿಂದ ನಮಗೆ ತುಂಬಾ ಮುಜುಗರವಾಗುತ್ತಿದೆ ಮತ್ತು ಹಿಂಸೆಯಾಗುತ್ತಿದೆ. ಈ ಬಗ್ಗೆ ಭಾರತೀಯ ರೈಲ್ವೆ ಇಲಾಖೆ, ಐಆರ್‌ಸಿಟಿಸಿ ಕಚೇರಿ ಮತ್ತು ರೈಲ್ವೆ ಮಂತ್ರಿ ಪಿಯೂಷ್ ಗೋಯಲ್ ಗಮನ ಹರಿಸಬೇಕು ಎಂದು ಕೋರಿ ಟ್ವೀಟ್ ಮಾಡಿದ್ದರು. ಇದಕ್ಕೆ ಐಆರ್​ಸಿಟಿಸಿ ಇಲಾಖೆಯು ನಿಖರವಾಗಿ ಉತ್ತರಿಸಿ ತಿರುಗೇಟು ನೀಡಿದೆ.

ಇದಕ್ಕೆ ರೈಲ್ವೆ ಇಲಾಖೆ ಹೇಳಿದ್ದೇನು?

ಇದಕ್ಕೆ ಐಆರ್​ಸಿಟಿಸಿ ಸಂಸ್ಥೆ ಕೊಟ್ಟ ಉತ್ತರ ಆತ ಜೀವನದಲ್ಲಿ ಮತ್ತೆಂದೂ ಇಂತಹ ತಪ್ಪು ಮಾಡದಂತೆ ಇತ್ತು. 'ದೂರುದಾರನ ಮೊಬೈಲ್​ನಲ್ಲಿ ಪೋಲಿ ಜಾಹೀರಾತುಗಳು ಕಾಣಲು ಯಾವುದೇ ತಾಂತ್ರಿಕ ದೋಷ ಕಾರಣವಲ್ಲ. ಬದಲಾಗಿ, ಅವರ ಮೊಬೈಲ್​ನ ಬ್ರೌಸರ್​ಗಳಲ್ಲಿ ಪೋರ್ನ್ ಸಂಬಂಧಿತ ತಾಣಗಳನ್ನೇ ಹೆಚ್ಚಾಗಿ ವೀಕ್ಷಿಸುತ್ತಿರುವುದೇ ಇಂತಹ ಜಾಹೀರಾತುಗಳಿಗೆ ಕಾರಣ ಎಂದು ಐಆರ್​ಸಿಟಿಸಿ ಹೇಳಿದೆ. ಇದು ದೂರುದಾರರದ್ದೇ ತಪ್ಪು ಎಂದು ಸ್ಪಷ್ಟಪಡಿಸಿದೆ.

ತನ್ನ ಮರ್ಯಾದೆ ತಾನೇ ಕಳೆದುಕೊಂಡ!

ಬಳಕೆದಾರ ಏನನ್ನು ಹೆಚ್ಚು ವೀಕ್ಷಿಸುತ್ತಾನೆ ಅಥವಾ ಯಾವುದರ ಬಗ್ಗೆ ಹೆಚ್ಚು ಆಸಕ್ತಿ ಹೊಂದಿದ್ದಾನೆ ಎಂಬುದನ್ನು ಬ್ರೌಸಿಂಗ್ ಹಿಸ್ಟರಿ ಮೂಲಕ ಅರ್ಥೈಸಿ ಗೂಗಲ್ ಜಾಹೀರಾತು ನೀಡುತ್ತದೆ. ನೀವು ಬ್ರೌಸರ್ ಕುಕ್ಕೀಸ್‌ ಮತ್ತು ಬ್ರೌಸಿಂಗ್ ಹಿಸ್ಟರಿಯನ್ನು ಕ್ಲೀನ್‌ ಮತ್ತು ಡಿಲೀಟ್‌ ಮಾಡಿ. ಮುಂದೆ ಅಂತಹ ಜಾಹೀರಾತುಗಳು ಬರುವುದಿಲ್ಲ ಎಂದು ಸಲಹೆ ನೀಡಿದೆ. ಇದರಿಂದ ರೈಲ್ವೆ ಇಲಾಖೆಯ ಮರ್ಯಾದೆ ಕಳೆಯಲು ಹೋದ ವ್ಯಕ್ತಿ ತನ್ನ ಮರ್ಯಾದೆಯನ್ನು ತಾನೇ ಕಳೆದುಕೊಂಡಿದ್ದಾನೆ.

ಆತನಿಗೆ ಅಶ್ಲೀಲ ಜಾಹಿರಾತು ಕಂಡಿದ್ದೇಗೆ?

ಆನ್‌ಲೈನಿನಲ್ಲಿ ಗೂಗಲ್ ಆಡ್‌ಸೆನ್ಸ್ ಮೂಲಕ ಜಾಹೀರಾತು ಭಿತ್ತರಿಸಲಾಗುತ್ತದೆ. ಜಾಹಿರಾತು ನೀಡಲು ಗೂಗಲ್‌ ಮತ್ತು ಎಡಿಎಕ್ಸ್‌ ಸರ್ವಿಂಗ್‌ ಟೂಲ್‌ಅನ್ನು ಬಳಕೆ ಮಾಡುತ್ತದೆ. ಬಳಕೆದಾರರನ್ನು ಗುರಿಯಾಗಿಸುವ ಕುಕ್ಕೀಸ್‌ ಕೆಲಸ ಮಾಡುತ್ತದೆ. ಇದು ಬಳಕೆದಾರನ ಹಿಸ್ಟರಿ ಮತ್ತು ಬ್ರೌಸಿಂಗ್‌ ಬಿಹೇವಿಯರ್‌ಅನ್ನು ಗ್ರಹಿಸಿ ಜಾಹೀರಾತುಗಳನ್ನು ನೀಡುತ್ತದೆ. ಐಆರ್‌ಸಿಟಿಸಿ ವೆಬ್‌ಸೈಟ್‌ನಲ್ಲಿ ಕೂಡ ಇದೇ ರೀತಿಯಲ್ಲಿ ಜಾಹಿರಾತುಗಳು ಕಾಣಿಸಿಕೊಳ್ಳುತ್ತವೆ.

ಈ ಟ್ವೀಟ್ ವೈರಲ್ ಆಗಿದ್ದು ಏಕೆ?

ಒಬ್ಬರಿಗೆ ಚಪ್ಪಲಿ ಕೊಟ್ಟು ತಾವೇ ಹೊಡೆಸಿಕೊಂಡರೆ ಹೇಗಿರುತ್ತದೆ ಎಂಬುದಕ್ಕೆ ಈ ಘಟನೆ ಉದಾಹರಣೆಯಾಗಿದೆ. ಆ ವ್ಯಕ್ತಿ ಆತನ ಮೊಬೈಲ್ ಅಥವಾ ಕಂಪ್ಯೂಟರ್​ನಲ್ಲಿ ಅಶ್ಲೀಲ ವಿಡಿಯೋ ನೋಡಿರುವುದರಿಂದಲೇ ಆತನಿಗೆ ಅಶ್ಲೀಲ ಜಾಹಿರಾತುಗಳು ಕಾಣಿಸಿಕೊಂಡಿವೆ. ಇಂಟರ್‌ನೆಟ್ ಬಗ್ಗೆ ಸರಿಯಾಗಿ ತಿಳಿಯದಿದ್ದರೆ ಹೇಗೆಲ್ಲಾ ಮುಜುಗರ ಅನುಭವಿಸಬೇಕು ನೋಡಿ ಎಂದು ಹಲವರು ಹೇಳಿದ್ದಾರೆ. ಜತೆಗೆ ಬ್ರೌಸಿಂಗ್ ಹಿಸ್ಟರಿಯನ್ನು ಕ್ಲಿಯರ್ ಮಾಡಿಕೊಳ್ಳಿ ಎಂದು ಸಲಹೆ ಕೂಡ ನೀಡಿದ್ದಾರೆ.