ಲಾಂಚ್‌ ಆಗಲಿದೆ ಒನ್‌ಪ್ಲಸ್‌ನ 100W ಫಾಸ್ಟ್ ಚಾರ್ಜರ್; 10 ನಿಮಿಷಕ್ಕೇ ಇಷ್ಟು ಚಾರ್ಜ್‌ ಆಗುತ್ತೆ!

ಹೌದು, ಸ್ಮಾರ್ಟ್‌ಫೋನ್ ಹಾಗೂ ಇನ್ನಿತರೆ ಡಿವೈಸ್‌ಗಳಿಗೆ ಫಾಸ್ಟ್‌ ಚಾರ್ಜರ್‌ ಒಂದು ವರದಾನ. ಈ ಮೂಲಕ ಚಾರ್ಜಿಂಗ್‌ಗಾಗಿಯೇ ಹೆಚ್ಚಿನ ಸಮಯ ಮೀಸಲಿಡುವುದನ್ನು ತಪ್ಪಿಸಬಹುದಾಗಿದೆ. ಹಾಗೆಯೇ ಅಗತ್ಯ ಇರುವ ಕೆಲಸವನ್ನು ತಕ್ಷಣವೇ ಮಾಡಲು ಇದು ಸಹಕಾರಿ. ಇದರ ಬೆನ್ನಲ್ಲೇ ಪ್ರಮುಖ ಸ್ಮಾರ್ಟ್ ಡಿವೈಸ್‌ ತಯಾರಿಕಾ ಕಂಪೆನಿಗಳಲ್ಲಿ ತನ್ನದೇ ಆದ ಜನಪ್ರಿಯತೆ ಪಡೆದುಕೊಂಡಿರುವ ಒನ್‌ಪ್ಲಸ್‌‌ ಬರೋಬ್ಬರಿ 100W ನ ಚಾರ್ಜಿಂಗ್‌ ಪರಿಚಯಿಸಲು ಮುಂದಾಗಿದೆ.

ಒನ್‌ಪ್ಲಸ್‌ ಸ್ಮಾರ್ಟ್‌ಫೋನ್‌ಗಳ ಹೊರತಾಗಿ ಇತರೆ ಉತ್ಪನ್ನಗಳನ್ನೂ ಸಹ ಪ್ರಾರಂಭಿಸಲು ಮುಂದಾಗಿದೆ. ಇದರ ಭಾಗವಾಗಿಯೇ ಇತ್ತೀಚಿಗೆ ವಿಭಿನ್ನ ಫೀಚರ್ಸ್‌ ಇರುವ ಮಾನಿಟರ್‌ ಒಂದನ್ನು ಸಹ ಅನಾವರಣ ಮಾಡಿತ್ತು. ಇದರೊಂದಿಗೆ ಈ ಕಂಪೆನಿಯ TWS ಇಯರ್‌ಬಡ್ಸ್ ಮತ್ತು ಟಿವಿಗಳು ಮಾರುಕಟ್ಟೆಯಲ್ಲಿ ಭಾರೀ ಸದ್ದು ಮಾಡುತ್ತಿವೆ. ಇದೆಲ್ಲದರ ನಡುವೆ ಹೊಸ ಸೂಪರ್‌ಫಾಸ್ಟ್‌ ಚಾರ್ಜರ್‌ ಎಲ್ಲರನ್ನೂ ಮೂಕವಿಸ್ಮಿತರನ್ನಾಗಿ ಮಾಡಲು ಮುಂದಾಗಿದೆ.

ಮೊದಲ ಚಾರ್ಜರ್‌

ಒನ್‌ಪ್ಲಸ್‌ ಮೊದಲ ಬಾರಿಗೆ ಈ 100W ಡ್ಯುಯಲ್ ಪೋರ್ಟ್ ಸೂಪರ್ ಫ್ಲಾಶ್ ಚಾರ್ಜರ್ ಅನ್ನು ಪರಿಚಯಿಸುತ್ತಿದ್ದು, ಈ ಚಾರ್ಜರ್ 65W ವರೆಗೆ ಪಿಡಿ ವೇಗದ ಚಾರ್ಜಿಂಗ್ ಅನ್ನು ಒದಗಿಸುತ್ತದೆ. ಹಾಗೆಯೇ ಈ ಹೊಸ ಚಾರ್ಜರ್ ಡ್ಯುಯಲ್ ಯುಎಸ್‌ಬಿ-ಎ ಹಾಗೂ ಟೈಪ್‌- ಸಿಇಂಟರ್ಫೇಸ್ ಆಯ್ಕೆ ಹೊಂದಿರಲಿದೆ ಎಂದು ಹೆಳಲಾಗುತ್ತಿದೆ.

ಏಕಕಾಲದಲ್ಲಿ ಎರಡೂ ಡಿವೈಸ್‌ಗಳನ್ನು ಚಾರ್ಜ್‌ ಮಾಡಬಹುದು

ಈ ಚಾರ್ಜರ್‌ನ ಪ್ರಮುಖ ವಿಶೇಷ ಎಂದರೆ ಏಕಕಾಲದಲ್ಲಿ ಎರಡೂ ಪೋರ್ಟ್‌ಗಳನ್ನು ಬಳಕೆ ಮಾಡಿಕೊಳ್ಳಬಹುದಾಗಿದೆ. ಅದರಲ್ಲೂ ಲ್ಯಾಪ್‌ಟಾಪ್‌ಗಳು, TWS ಮತ್ತು ಸ್ಮಾರ್ಟ್‌ಫೋನ್‌ಗಳಂತಹ ನಿಮ್ಮ ಎಲ್ಲಾ ಹೊಂದಾಣಿಕೆಯ ಡಿವೈಸ್‌ಗಳನ್ನು ಚಾರ್ಜ್ ಮಾಡಲು ಈ ಚಾರ್ಜರ್ ಅನುಕೂಲವಾಗಿದೆ.

ಒನ್‌ಪ್ಲಸ್ 11 ಸ್ಮಾರ್ಟ್‌ಫೋನ್‌ಗೆ ಸಹಾಯಕ

ಈ ಸೂಪರ್‌ ಫಾಸ್ಟ್‌ ಚಾರ್ಜರ್‌ ನಿಮಿಷಗಳ ಲೆಕ್ಕದಲ್ಲಿ ನಿಮ್ಮ ಡಿವೈಸ್‌ಗಳನ್ನು ಚಾರ್ಜ್‌ ಮಾಡುತ್ತದೆ. ಅದರಲ್ಲೂ ಮುಂದೆ ಮಾರುಕಟ್ಟೆಯಲ್ಲಿ ಸದ್ದು ಮಾಡಲಿರುವ ಒನ್‌ಪ್ಲಸ್ 11 ಅನ್ನು ಗುರಿಯಾಗಿಸಿಕೊಂಡು ಈ ಡಿವೈಸ್‌ ತಯಾರಿಸಲಾಗಿದೆ ಎಂದು ಹೇಳಲಾಗುತ್ತಿದ್ದು, ಈ ಸ್ಮಾರ್ಟ್‌ಫೋನ್‌ 5000mAh ಸಾಮರ್ಥ್ಯದ ಬ್ಯಾಟರಿಯಿಂದ ಪ್ಯಾಕ್‌ ಆಗಿರಲಿದೆ ಎಂದು ಹೇಳಲಾಗುತ್ತಿದೆ.

10 ನಿಮಿಷಗಳಲ್ಲಿ ಆಗುವ ಚಾರ್ಜಿಂಗ್‌ ಎಷ್ಟು?

ಖಂಡಿತಾ ಈ ವಿಷಯದಲ್ಲಿ ನಿಮಗೆ ಆಸಕ್ತಿ ಇದ್ದೇ ಇರುತ್ತದೆ. ಯಾಕೆಂದರೆ ಈಗಾಗಲೇ ಮಾರುಕಟ್ಟೆಯಲ್ಲಿ ಲಭ್ಯ ಇರುವ ಸೂಪರ್‌ ಫಾಸ್ಟ್‌ ಚಾರ್ಜರ್‌ಗಳು ತಮ್ಮದೇ ಆದ ಶಕ್ತಿಯನ್ನು ಪ್ರದರ್ಶಿಸಿವೆ. ಇದರ ನಡುವೆ ಹೊಸದಾಗಿ ಅನಾವರಣ ಆಗುತ್ತಿರುವ ಡಿವೈಸ್‌ ಕೇವಲ 25 ನಿಮಿಷಗಳಲ್ಲಿ 100% ಮತ್ತು ಕೇವಲ 10 ನಿಮಿಷಗಳಲ್ಲಿ 50% ವರೆಗೆ ಚಾರ್ಜ್‌ ಮಾಡಲಿದೆ. ಅಂದರೆ ಬೆಳಗ್ಗೆ ಎದ್ದು ನಿಮ್ಮ ಹಾಸಿಗೆ ಹಾಗೂ ಕೋಣೆಯನ್ನು ಸ್ವಚ್ಛ ಮಾಡುವುದರ ಒಳಗೆ ನಿಮ್ಮ ಡಿವೈಸ್‌ ಚಾರ್ಜ್‌ ಭರ್ತಿ ಆಗಿರುತ್ತದೆ.

ಇನ್ನು ಒನ್‌ಪ್ಲಸ್ 11 ದೀರ್ಘ ಸಾಮರ್ಥ್ಯ ಬ್ಯಾಟರಿ ಇರುವ ಸ್ಮಾರ್ಟ್‌ಫೋನ್‌ ಆಗಿರಲಿದ್ದು, ಈ ಹೊಸ ಚಾರ್ಜರ್ ಬೆಂಬಲಿಸುವ ಮೊದಲ ಸ್ಮಾರ್ಟ್‌ಫೋನ್‌ ಆಗಿರಲಿದೆ . ಈ ಫೋನ್ 13 ಸೆನ್ಸರ್‌ ಮತ್ತು ನಿರ್ದಿಷ್ಟವಾಗಿ ವಿನ್ಯಾಸಗೊಳಿಸಲಾದ ಬ್ಯಾಟರಿ ನಿರ್ವಹಣೆ ಚಿಪ್ ಮೂಲಕ ಇದು ಕಾರ್ಯನಿರ್ವಹಿಸಲಿದ್ದು, ಬ್ಯಾಟರಿಯ ಸ್ಥಿತಿಗತಿ ಬಗ್ಗೆ ಸದಾಕಾಲ ಕಣ್ಣಿಟ್ಟಿರುತ್ತದೆ.

ಒನ್‌ಪ್ಲಸ್‌ ತನ್ನ ಬ್ರ್ಯಾಂಡಿಂಗ್ ಮೂಲಕ ಈ 100W ಡ್ಯುಯಲ್ ಪೋರ್ಟ್ ಫಾಸ್ಟ್‌ ಚಾರ್ಜರ್ ಅನಾವರಣ ಮಾಡಲು ಸಿದ್ಧವಾಗುತ್ತಿದ್ದು, ಈ ಡಿವೈಸ್‌ ಬಗ್ಗೆ ಚೀನಿ ಮಾರುಕಟ್ಟೆಯಲ್ಲಿ ಮಾತ್ರ ಅಧಿಕೃತವಾಗಿ ದೃಢೀಕರಿಸಲಾಗಿದೆ. ಆದರೆ, ಜಾಗತಿಕವಾಗಿ ಯಾವಾಗಲಿಂದ ಇದು ಲಭ್ಯವಾಗಲಿವೆ ಎಂಬ ಬಗ್ಗೆ ಮಾಹಿತಿ ತಿಳಿದುಬಂದಿಲ್ಲ.