ಇನ್‌ಸ್ಟಾಗ್ರಾಮ್, ಟಿಕ್‌ಟಾಕ್‌ನಂತೆಯೇ ಯೂಟ್ಯೂಬ್‌ನಲ್ಲಿ ಈಗ 'ಹ್ಯಾಂಡಲ್‌' ಆಯ್ಕೆ!

ಹೌದು, ಈಗ ಯೂಟ್ಯೂಬ್‌ ತಾಣವು ಇನ್‌ಸ್ಟಾಗ್ರಾಮ್, ಟಿಕ್‌ಟಾಕ್‌ ರೀತಿಯಲ್ಲಿ ವಿಶಿಷ್ಟ ಹ್ಯಾಂಡಲ್‌ಗಳನ್ನು(Handles) ಪಡೆದುಕೊಳ್ಳಲಿದೆ. ಈ ಮೂಲಕ ಚಾನಲ್‌ ಜೊತೆಗೆ ಮತ್ತೊಂದು ಅನನ್ಯ ಹೆಸರನ್ನು ನಮೂದು ಮಾಡಿಕೊಳ್ಳಬಹುದು. ಉದಾಹರಣೆಗೆ ನಿಮ್ಮ ಚಾನಲ್‌ ಹೆಸರು Alex ಎಂದು ಇದ್ದರೆ ಹ್ಯಾಂಡಲ್‌ನಲ್ಲಿ Alexblog1 ನಂತಹ ಹೆಸರನ್ನು ನಮೂದಿಸಿಕೊಳ್ಳಬಹುದು. ಈ ರೀತಿ ಮಾಡುವುದರಿಂದ ಒಂದೇ ರೀತಿಯ ಹೆಸರುಳ್ಳ ಚಾನಲ್‌ಗಳಿಂದ ಗೊಂದಲಕ್ಕೆ ಒಳಗಾಗುವುದು ತಪ್ಪುತ್ತದೆ ಹಾಗೂ ನಿಖರವಾಗಿ ಕಂಟೆಂಟ್‌ ಕ್ರಿಯೇಟರ್ಸ್‌ಗಳನ್ನು ಪತ್ತೆ ಮಾಡುವುದು ಸುಲಭವಾಗುತ್ತದೆ.

ಈ ಫೀಚರ್ಸ್‌ ಚಾನಲ್‌ನ ಪೇಜ್‌ ಹಾಗೂ ಶಾರ್ಟ್‌ ವಿಡಿಯೋ ವಿಭಾಗದಲ್ಲಿ ಕಾಣಿಸಿಕೊಳ್ಳಲಿದೆ. ಈ ಮೂಲಕ ಬಳಕೆದಾರರು ಯೂಟ್ಯೂಬ್‌ ಚಾನಲ್ ಕ್ರಿಯೇಟರ್ಸ್‌ಗಳನ್ನು ಸುಲಭವಾಗಿ ಪತ್ತೆಮಾಡಲು ಅನುವು ಮಾಡಿಕೊಡಲಾಗಿದೆ. ಇದಿಷ್ಟೇ ಅಲ್ಲದೆ, ಕಮೆಂಟ್, ಕಮ್ಯೂನಿಟಿ ಪೋಸ್ಟ್‌, ವಿಡಿಯೋ ಡಿಸ್ಕ್ರಿಪ್ಶನ್ ಸೇರಿದಂತೆ ಇನ್ನಿತರ ವಿಭಾಗಗಳಲ್ಲಿ ಬಳಕೆದಾರರ ಸಂವಹನಕ್ಕೆ ಈ ಹ್ಯಾಂಡಲ್‌ ಸಹಾಯಕವಾಗಲಿದೆ ಎಂದು ಯೂಟ್ಯೂಬ್‌ ಮಾಹಿತಿ ನೀಡಿದೆ.

ಇನ್‌ಸ್ಟಾಗ್ರಾಮ್, ಟಿಕ್‌ಟಾಕ್‌ನಂತಹ ಫೀಚರ್‌

ಯೂಟ್ಯೂಬ್ ಚಾನಲ್ ಅಥವಾ ಕ್ರಿಯೇಟರ್ಸ್‌ಗಳನ್ನು ಪತ್ತೆ ಮಾಡಲು ಈ ಹಿಂದೆ ಚಾನಲ್‌ ಹೆಸರನ್ನು ಮಾತ್ರ ಸರ್ಚ್ ಮಾಡಬೇಕಾದ ಸ್ಥಿತಿ ಇತ್ತು. ಆದರೆ, ಈಗ ಈ ಹ್ಯಾಂಡಲ್‌ ಆಯ್ಕೆ ನೀಡಲಾಗಿದ್ದು, ಚಾನಲ್‌ಗಳ ಹೆಸರಿನ ಜೊತೆಗೆಯೇ ಈ ಹ್ಯಾಂಡಲ್‌ಗಳು ಕಾಣಿಸಿಕೊಳ್ಳಲಿವೆ ಎಂದು ಯೂಟ್ಯೂಬ್‌ ತಿಳಿಸಿದೆ. ಈಗಾಗಲೇ ಸಾಂಪ್ರದಾಯಿಕವಾಗಿ ಇದ್ದ ಚಾನಲ್ ಹೆಸರುಗಳಿಗಿಂತ ಭಿನ್ನವಾಗಿ ಈ ಫೀಚರ್ಸ್‌ನಲ್ಲಿ ವಿಶಿಷ್ಟ ಹೆಸರಿನ ಆಯ್ಕೆ ಇರಲಿದೆ ಎನ್ನಲಾಗಿದೆ. ಈ ಮೂಲಕ ಕ್ರಿಯೇಟರ್ಸ್‌ ಯೂಟ್ಯೂಬ್‌ನಲ್ಲಿ ತಮ್ಮದೇ ಆದ ಬ್ರಾಂಡ್‌ ಸೃಷ್ಟಿ ಮಾಡಿಕೊಳ್ಳಬಹುದಾಗಿದೆ.

ನೆಚ್ಚಿನ ಕ್ರಿಯೇಟರ್ಸ್‌ ಜೊತೆ ಕನೆಕ್ಟ್‌ ಆಗಿರಬಹುದು

ಈ ಆಯ್ಕೆಯಲ್ಲಿ ವೀಕ್ಷಕರು ತಮ್ಮ ನೆಚ್ಚಿನ ಕ್ರಿಯೇಟರ್ಸ್‌ಗಳ ಜೊತೆ ಸಂವಹನ ನಡೆಸಬಹುದು ಎಂಬ ವಿಶ್ವಾಸವನ್ನು ಹೆಚ್ಚಿಸುವ ಜೊತೆಗೆ ರಚನೆಕಾರರು ಸಹ ತಮ್ಮ ಕಂಟೆಂಟ್‌ನಂತೆಯೇ ವಿಶಿಷ್ಟವಾದ ಗುರುತನ್ನು ಸೃಷ್ಟಿಮಾಡಿಕೊಳ್ಳಬಹುದು ಎಂಬುದನ್ನು ನಾವು ಖಚಿತಪಡಿಸಿಕೊಳ್ಳಲು ಬಯಸುತ್ತೇವೆ ಎಂದು ಯೂಟ್ಯೂಬ್‌ ಉಲ್ಲೇಖಿಸಿದೆ. ಈ ಫೀಚರ್ ಈಗಾಗಲೇ ಟಿಕ್‌ಟಾಕ್ ಮತ್ತು ಇನ್‌ಸ್ಟಾಗ್ರಾಮ್‌ನಲ್ಲಿ ಇರುವುದನ್ನು ನಾವು ಗಮನಿಸಬಹುದು.

ಪ್ರತಿ ಹ್ಯಾಂಡಲ್‌ ಅನನ್ಯವಾಗಿರುತ್ತವೆ

ಯೂಟ್ಯೂಬ್‌ನ ಬ್ಲಾಗ್‌ಪೋಸ್ಟ್ ಪ್ರಕಾರ, ಈ ವಾರದಿಂದ ಯೂಟ್ಯೂಬ್ ಬಳಕೆದಾರರಿಗೆ ಹಂತ ಹಂತವಾಗಿ ಈ ಹ್ಯಾಂಡಲ್‌ಗಳನ್ನು ಪರಿಚಯಿಸಲಾಗುತ್ತದಂತೆ. ನಂತರ ಈ ಫೀಚರ್‌ಗೆ ಬೆಂಬಲವನ್ನು ನೀಡಲಾಗುವುದು ಎಂದಿರುವ ಯೂಟ್ಯೂಬ್‌, ಈ ಹ್ಯಾಂಡಲ್‌ ಅನನ್ಯವಾಗಿರುತ್ತವೆ ಹಾಗೆಯೇ ಯೂಟ್ಯೂಬ್‌ ನಲ್ಲಿ ಎಲ್ಲಾ ಆಯ್ದ ಚಾನಲ್ ಈ ಆಯ್ಕೆ ಹೊಂದಿರಲಿವೆ ಎಂದು ತನ್ನ ಬ್ಲಾಗ್‌ನಲ್ಲಿ ಉಲ್ಲೇಖಿಸಿದೆ.

ಈ ನಿಯಮ ಕಡ್ಡಾಯ

ಬಳಕೆದಾರರು ಹ್ಯಾಂಡಲ್ ಹೆಸರನ್ನು ಪಡೆಯಬೇಕೆಂದರೆ ಕೆಲವು ಮಾಹಿತಿಯನ್ನು ತಿಳಿಯಲೇಬೇಕಿದ್ದು, ಯಾವಾಗ ಬಳಕೆದಾರರಿಗೆ ಈ ಹ್ಯಾಂಡಲ್‌ ಆಯ್ಕೆ ಲಭ್ಯವಾಗಲಿದೆಯೋ ಆಗ ಅವರು ಯೂಟ್ಯೂಬ್‌ನಿಂದ ನೋಟಿಫಿಕೇಶನ್‌ ಒಂದನ್ನು ಪಡೆಯುತ್ತಾರೆ. ಈ ಹ್ಯಾಂಡಲ್‌ ಆಯ್ಕೆಯನ್ನು ಯೂಟ್ಯೂಬ್‌ ಪ್ಲಾಟ್‌ಫಾರ್ಮ್‌ನಲ್ಲಿ ನಡೆಸಲಾದ ಒಟ್ಟಾರೆ ಕಾರ್ಯಚಟುವಟಿಕೆ, ಚಂದಾದಾರರ ಸಂಖ್ಯೆ ಮತ್ತು ಚಾನಲ್ ಸಕ್ರಿಯವಾಗಿದೆಯೇ? ಇಲ್ಲವೇ ಎಂಬುದನ್ನು ಆಧರಿಸಿಕೊಂಡು ನೀಡಲಾಗುತ್ತದಂತೆ.

URLಗೆ ಸಮಸ್ಯೆ ಇಲ್ಲ

ಇನ್ನು ಈಗಾಗಲೇ ವೈಯಕ್ತೀಕರಿಸಿದ URLಗೆ ಯಾವುದೇ ಸಮಸ್ಯೆ ಆಗದಂತೆ ಈ ಹ್ಯಾಂಡಲ್‌ ಫೀಚರ್ಸ್‌ ನೀಡಲಾಗುತ್ತಿದೆ. ಬಳಕೆದಾರರು ತಮಗೆ ಬೇಕಿರುವ ಹ್ಯಾಂಡಲ್ ಹೆಸರನ್ನು URLನಲ್ಲಿ ಪಡೆಯಲು ಅರ್ಹರಾದಾಗ ಅದಕ್ಕೆ ಸಂಬಂಧಿಸಿದಂತೆ ಅವರಿಗೆ ಒಂದು ನೋಟಿಫಿಕೇಶನ್ ರವಾನೆ ಆಗುತ್ತದೆ. ಆಗ ಡಿಫಾಲ್ಟ್‌ ಆಗಿ URL ಬದಲಾಗುತ್ತದೆ.