ಫೇಸ್ಬುಕ್ ನ್ಯೂಸ್ ಫೀಡ್ ಗೆ ಹೊಸ ವಿನ್ಯಾಸ , ನ್ಯಾವಿಗೇಶನ್ ಇನ್ನಷ್ಟು ಸರಳ!

ಉತ್ತಮ ಸಂಭಾಷಣೆಗಳು

ಫೇಸ್ಬುಕ್ ಬಳಕೆದಾರರು ಈ ಸಾಮಾಜಿಕ ಜಾಲತಾಣದಲ್ಲಿ ಹೆಚ್ಚು ಜೀವಂತಿಕೆಯುಳ್ಳ,ಉತ್ತಮ ಭಾವಾಭಿವ್ಯಕ್ತಿಯಿಂದ ಕೂಡಿದ ಅರ್ಥಪೂರ್ಣ ಸಂಭಾಷಣೆಗಳನ್ನು ನಡೆಸುವಂಥಾಗಬೇಕು ಎನ್ನುವುದು ಫೇಸ್ಬುಕ್ ನ ಆಶಯ. ಫೇಸ್ಬುಕ್ನಲ್ಲಿ ಪೋಸ್ಟ್ ಒಂದರ ಕುರಿತು ಜನರೊಂದಿಗೆ ಸಂಭಾಷಿಸಲು ಕಮೆಂಟ್ಗಳು ಮುಖ್ಯ ಮಾಧ್ಯಮವಾಗುತ್ತದೆ.ಇದಕ್ಕೆಂದೇ ಫೇಸ್ಬುಕ್ ಕಂಪೆನಿಯು ತನ್ನ ಕೆಮಂಟ್ಗಳ ವಿನ್ಯಾಸವನ್ನು ನವೀಕರಿಸಿದೆ.ಈ ಮುಖಾಂತರ ಇನ್ನೊಬ್ಬ ವ್ಯಕ್ತಿಗೆ ಕಮೆಂಟ್ ಮುಖೇನ ನೀಡಿದ ನೇರ ಪ್ರತ್ಯುತ್ತರಗಳನ್ನು ಗುರುತಿಸಲು ಸುಲಭವಾಗಲಿದೆ.

ನ್ಯೂಸ್ಫೀಡ್ ಓದಲು ಸುಲಭ

ಫೆಸ್ಬುಕ್ ತನ್ನ ನ್ಯೂಸ್ಫೀಡ್ ಅನ್ನು ಓದಲು ಇನ್ನಷ್ಟು ಸುಲಭವಾಗುವಂತೆ ಮಾಡುವ ಪ್ರಯತ್ನದಲ್ಲಿದೆ. ಇದಕ್ಕಾಗಿ ನ್ಯೂಸ್ಫೀಡ್ ನ ವಿನ್ಯಾಸದಲ್ಲಿ ಕೆಲವೊಂದು ಬದಲಾವಣೆಗಳನ್ನು ತರಲಿದ್ದು ಬಳಕೆದಾರರಿಗೆ ಹೊಸ ಅನುಭವವನ್ನು ನೀಡಲಿದೆಯಂತೆ. ನ್ಯೂಸ್ಫೀಡ್ ನ ಕಲರ್ ಕಾಂಟ್ರಾಸ್ಟ್ ಅನ್ನು ಹೆಚ್ಚಿಸುವ ಮೂಲಕ ಅಕ್ಷರಗಳು ಹೆಚ್ಚು ಸ್ಪಷ್ಟವಾಗಿ ಕಾಣುವಂತೆ ಮಾಡಲಿದೆ. ಅಲ್ಲದೆ ದೊಡ್ಡದಾದ ಲಿಂಕ್ ಪ್ರಿವ್ಯೂಗಳು ಇರಲಿದೆ. ಇವುಗಳ ಮೂಲಕ ನ್ಯೂಸ್ಫೀಡ್ ಓದಲು ಮತ್ತಷ್ಟು ಸುಲಭವೆನಿಸಲಿದೆ.

ಇಷ್ಟೇ ಅಲ್ಲದೆ ಕೆಲವು ಐಕಾನ್ ಗಳನ್ನು ಮತ್ತು ಲೈಕ್, ಶೇರ್, ಕಮೆಂಟ್ ಮುಂತಾದ ಬಟನ್ ಗಳನ್ನು ಹಿರಿದಾಗಿಸಿದ್ದು, ಒತ್ತಲು ಇನ್ನಷ್ಟು ಅನುಕೂಲಕರವಾಗಲಿದೆ.ಅಲ್ಲದೆ ಯಾರು ಪೋಸ್ಟ್ ಅಥವ ಕಮೆಂಟ್ ಮಾಡುತ್ತಿದ್ದಾರೆ ಎಂಬುದನ್ನು ತೋರಿಸಲು ವೃತ್ತಾಕಾರದ ಪ್ರೊಫೈಲ್ ಚಿತ್ರಗಳನ್ನು ಬಳಸಲಾಗುತ್ತದೆ.

ಸುಲಭವಾದ ನ್ಯಾವಿಗೇಶನ್

ಜನರು ನ್ಯೂಸ್ಫೀಡ್ ನ್ಯಾವಿಗೇಟ್ ಮಾಡುವ ರೀತಿಯನ್ನು ಉತ್ತಮವಾಗಿಸುವ ಪ್ರಯತ್ನ ಫೇಸ್ಬಕ್ನದ್ದು. ನ್ಯೂಸ್ಫೀಡ್ ನಲ್ಲಿರುವ ಲಿಂಕ್ ಗಳನ್ನು ಕ್ಲಿಕ್ ಮಾಡಿದರೆ ಅದು ನಮ್ಮನ್ನು ಎಲ್ಲಿಗೆ ಕರೆದೊಯ್ಯುತ್ತದೆ ಎಂಬುದನ್ನು ಕ್ಲಿಕ್ ಮಾಡುವ ಮುಂಚಿತವಾಗಿಯೇ ತಿಳಿಯಬಹುದಂತೆ.

ಅಲ್ಲದೆ ಬಳಕೆದಾರರು ಅವರು ಯಾರ ಪೋಸ್ಟನ್ನು ಓದುತ್ತಿದ್ದಾರೆ, ಯಾರ ಪೋಸ್ಟ್ ಗೆ ಕಮೆಂಟ್ ಅಥವ ರಿಯಾಕ್ಟ್ ಮಾಡಲಿದ್ದಾರೆ ಎಂಬುದನ್ನು ಆ ಪೋಸ್ಟಲ್ಲಿರುವಂತೆಯೇ ತಿಳಿದುಕೊಳ್ಳಬಹುದು. ಆ ಪೋಸ್ಟ್ ಅನ್ನು ನೋಡಿದ ನಂತರ ಮತ್ತೆ ತಮ್ಮ ನ್ಯೂಸ್ಫೀಡ್ ಗೆ ಹಿಂದಿರುಗಲು ಎದ್ದುಕಾಣುವಂಥ ಬ್ಯಾಕ್ ಬಟನ್ ಒಂದನ್ನು ನೀಡಲಾಗುತ್ತದೆ.

ಈ ಹೊಸ ಬದಲಾವಣೆಗಳು ಫೆಸ್ಬುಕ್ ಪುಟಗಳ ತಲುಪುವಿಕೆ ಅಥವಾ ರೆಫರಲ್ ಟ್ರ್ಯಾಫಿಕ್ ಮೇಲೆ ಯಾವುದೇ ರೀತಿಯ ಪ್ರಭಾವ ಬೀರುವುದಿಲ್ಲ ಎಂದು ಫೇಸ್ಬುಕ್ ಸ್ಪಷ್ಟೀಕರಿಸಿದೆ.