ಹೊಸ ಆಪ್‌ ಡೌನ್‌ಲೋಡ್‌ ಮಾಡುವ ಮುನ್ನ ಎಚ್ಚರ..ಎಚ್ಚರ..ಎಚ್ಚರ!

ಈ ಏಜೆನ್ಸಿಯು ಆಂಡ್ರಾಯ್ಡ್‌ ಸ್ಮಾರ್ಟ್‌ಫೋನ್‌ ಬಳಕೆದಾರರಿಗೆ ಕೆಲವು ಪ್ರಮುಖ ಸುರಕ್ಷತಾ ಕ್ರಮಗಳ ಬಗ್ಗೆ ಸಲಹೆಗಳನ್ನು ನೀಡಿದೆ. ಗೂಗಲ್ ಪ್ಲೇ ಸ್ಟೋರ್‌ನಿಂದ ಯಾವುದೇ ಹೊಸ ಅಪ್ಲಿಕೇಶನ್ ಡೌನ್‌ಲೋಡ್ ಮಾಡುವ ಮೊದಲು ಯಾವೆಲ್ಲಾ ಅಂಶಗಳ ಬಗ್ಗೆ ಗಮನ ನೀಡಬೇಕು ಎನ್ನುವ ಬಗ್ಗೆ ಕೆಲವು ಬಹುಮುಖ್ಯ ಸಲಹೆ ನೀಡಿದೆ. ಹಾಗಾದರೇ ಆಪ್‌ ಡೌನ್‌ಲೋಡ್ ಮಾಡುವ ಮುನ್ನ ತಪ್ಪದೇ ಗಮನಿಸಬೇಕಾದ ಅಂಶಗಳ ಬಗ್ಗೆ ಮುಂದೆ ನೋಡೋಣ ಬನ್ನಿರಿ.

ಅಧಿಕೃತ ಅಪ್ಲಿಕೇಶನ್ ಸ್ಟೋರ್‌ ಬಳಕೆ

ಬಳಕೆದಾರರು ತಮ್ಮ ಸ್ಮಾರ್ಟ್‌ಫೋನಿಗೆ ಹೊಸ ಅಪ್ಲಿಕೇಶನ್‌ಗಳನ್ನು ಡೌನ್‌ಲೋಡ್ ಮಾಡಲು ಅಧಿಕೃತ ಅಪ್ಲಿಕೇಶನ್ ಸ್ಟೋರ್‌ಗಳನ್ನು (ಗೂಗಲ್ ಪ್ಲೇ ಸ್ಟೋರ್) ಮಾತ್ರ ಬಳಸುವುದು ಅತೀ ಮುಖ್ಯವಾಗಿದೆ.

ಬಳಸದ ಆಪ್‌ ಅನ್‌ಇನ್‌ಸ್ಟಾಲ್ ಮಾಡಿ

ಕೆಲವೊಮ್ಮೆ ಬಳಕೆದಾರರ ಸ್ಮಾರ್ಟ್‌ಫೋನ್‌ನಲ್ಲಿ ಮೇಲಿಂದ ಮೇಲೆ ಬಳಸದೆ ಇರುವ ಆಪ್‌ಗಳು ಹೆಚ್ಚಾಗಿರುತ್ತವೆ. ಹೀಗೆ ತುಂಬಾ ದಿನಗಳಿಂದ ಬಳಸದೇ ಇರುವ ಆಪ್‌ಗಳನ್ನು ನಿಮ್ಮ ಫೋನಿನಿಂದ ಗೇಟ್‌ಪಾಸ್‌ ನೀಡಿ. ಸುರಕ್ಷತೆಯ ದೃಷ್ಠಿಯಿಂದ ಇದು ಉತ್ತಮ.

ಆಪ್‌ ಡೌನ್‌ಲೋಡ್‌ಗೂ ಮುನ್ನ ರಿವ್ಯೂವ್‌ಗಳನ್ನು ಓದಿರಿ

ಗೂಗಲ್‌ ಪ್ಲೇ ಸ್ಟೋರ್‌ನಿಂದ ಹೊಸ ಆಪ್‌ ಅನ್ನು ಸ್ಮಾರ್ಟ್‌ಫೋನಿಗೆ ಡೌನ್‌ಲೋಡ್ ಮಾಡುವಾಗ ಆ ಬಗ್ಗೆ ಇತರೆ ಬಳಕೆದಾರರು ಬರೆದಿರುವ ವಿಮರ್ಶೆಗಳನ್ನು ಓದಿರಿ. ಹಾಗೂ ಆಪ್‌ ಡೆವಲಪರ್‌ಗಳ ಬಗ್ಗೆ ತಿಳಿಯಿರಿ.

ಡಿಸ್ಕೌಂಟ್‌ ನೀಡುವ ಆಪ್‌ಗಳಿಂದ ದೂರ ಇರಿ

ಬಹುತೇಕ ಆಪ್‌ಗಳಲ್ಲಿ ಆನ್‌ಲೈನ್ ಶಾಪಿಂಗ್ ರಿಯಾಯಿತಿಗಳನ್ನು ನೀಡುವ ಜಾಹಿರಾತು ತೋರಿಸುತ್ತಿರುತ್ತಾರೆ. ಇಂತಹ ಭರವಸೆ ನೀಡುವ ಅಪ್ಲಿಕೇಶನ್‌ಗಳ ಬಗ್ಗೆ ಬಳಕೆದಾರರು ಎಚ್ಚರದಿಂದಿರಬೇಕು.

ಲಿಂಕ್‌ ಮೂಲಕ ಆಪ್‌ ಡೌನ್‌ಲೋಡ್ ಬೇಡ

ಇಮೇಲ್‌ಗಳು, ಸಾಮಾಜಿಕ ಮಾಧ್ಯಮ ಇತ್ಯಾದಿಗಳಲ್ಲಿನ ಲಿಂಕ್‌ಗಳನ್ನು ಕ್ಲಿಕ್ ಮಾಡುವುದರ ಮೂಲಕ ಅಪ್ಲಿಕೇಶನ್‌ಗಳನ್ನು ಇನ್‌ಸ್ಟಾಲ್‌ ಮಾಡುವುದನ್ನು ತಪ್ಪಿಸಿ.