ಗೂಗಲ್‌ನಲ್ಲಿ ಈ ವರ್ಷ ಹೆಚ್ಚಾಗಿ ಹುಡುಕಿದ ಸಿನಿಮಾಗಳಿವು; ಕನ್ನಡದ ಎರಡು ಚಿತ್ರಗಳೂ ಇವೆ!

ಹೌದು, ಈ ವರ್ಷ ಹಲವಾರು ಸಿನಿಮಾಗಳು ಭಾರತೀಯ ಚಿತ್ರರಂಗದಲ್ಲಿ ಹೆಚ್ಚು ಹೆಚ್ಚಾಗಿ ಸದ್ದು ಮಾಡಿವೆ. ಅದರಲ್ಲಿ ಕನ್ನಡದ ಹಲವು ಸಿನಿಮಾಗಳು ಸಿನಿ ರಸಿಕರ ಮನತಣಿಸಿವೆ. ಅದರಂತೆ ಗೂಗಲ್‌ನಲ್ಲಿ ಭಾರತೀಯರು ಹೆಚ್ಚು ಹುಡುಕಲಾದ ಕನ್ನಡ ಸಿನಿಮಾ ಯಾವುದು?, ಇತರೆ ಸಿನಿಮಾಗಳು ಯಾವುವು? ಎಂಬುದನ್ನು ಈ ಲೇಖನದಲ್ಲಿ ವಿವರಿಸಿದ್ದೇವೆ ಓದಿರಿ.

ಬ್ರಹ್ಮಾಸ್ತ್ರ: ಪಾರ್ಟ್‌ 1 - ಶಿವ

ಬ್ರಹ್ಮಾಸ್ತ್ರ: ಪಾರ್ಟ್‌ 1 - ಶಿವ ಸಿನಿಮಾವನ್ನು ಗೂಗಲ್‌ನಲ್ಲಿ ಹೆಚ್ಚಾಗಿ ಸರ್ಚ್‌ ಮಡಲಾಗಿದೆ. ಈ ಸಿನಿಮಾದಲ್ಲಿ ಅಮಿತಾಬ್ ಬಚ್ಚನ್, ಶಾರುಖ್ ಖಾನ್, ನಾಗಾರ್ಜುನ, ಆಲಿಯಾ ಭಟ್, ರಣಬೀರ್ ಕಪೂರ್ ಮುಂತಾದವರು ನಟಿಸಿದ್ದಾರೆ. ಹಾಗೆಯೇ ಈ ಸಿನಿಮಾ ಡಿಸ್ನಿ+ ಹಾಟ್‌ಸ್ಟಾರ್‌ನಲ್ಲಿ ಲಭ್ಯವಿದೆ.

ಕಾಶ್ಮೀರ್‌ ಫೈಲ್ಸ್

ಕಾಶ್ಮೀರ್‌ ಫೈಲ್ಸ್ ಬಿಡುಗಡೆಯಾದಾಗ ದೇಶದಲ್ಲಿ ರಾಷ್ಟ್ರೀಯತೆಯ ಭಾವನೆ ಎಲ್ಲರಲ್ಲೂ ಉಂಟಾಗಿತ್ತು. ಅದರಲ್ಲೂ ಕೆಲವು ಸರ್ಕಾರಗಳು ಉಚಿತ ಪ್ರದರ್ಶನಕ್ಕೆ ಅವಕಾಶ ಕಲ್ಪಿಸಿದ್ದವು. ಹಾಗೆಯೇ ಹೆಚ್ಚು ವಿವಾದಕ್ಕೂ ಗುರಿಯಾದ ಸಿನಿಮಾ ಇದಾಗಿದೆ. ಈ ಸಿನಿಮಾವನ್ನು ವಿವೇಕ್ ರಂಜನ್ ಅಗ್ನಿಹೋತ್ರಿ ನಿರ್ದೇಶನ ಮಾಡಿದ್ದಾರೆ. 90ರ ದಶಕದ ಮೊದಲು ಕಾಶ್ಮೀರಿ ಪಂಡಿತರನ್ನು ಹೊರಹಾಕಿದ ಕಥೆಯನ್ನು ಈ ಚಿತ್ರ ಆಧರಿಸಿದೆ. ಸದ್ಯಕ್ಕೆ ಈ ಚಿತ್ರವನ್ನು ಜೀ5 ಓಟಿಟಿ ಸೈಟ್‌ನಲ್ಲಿ ವೀಕ್ಷಿಸಬಹುದು.

ಆರ್‌ಆರ್‌ಆರ್‌

ರಾಜಮೌಳಿ ನಿರ್ದೇಶನದ ಚಿತ್ರ ಆರ್‌ಆರ್‌ಆರ್‌ ತೆಲುಗು ಚಿತ್ರರಂಗವಲ್ಲದೇ ಇಡೀ ಜಗತ್ತಿನಾದ್ಯಂತ ಸದ್ದು ಮಾಡಿದ ಚಿತ್ರವಾಗಿದೆ. ಈ ಚಿತ್ರದಲ್ಲಿ ಜೂನಿಯರ್ ಎನ್ಟಿಆರ್, ರಾಮ್ ಚರಣ್ ಮತ್ತು ಆಲಿಯಾ ಭಟ್ ಅಭಿನಯಿಸಿದ್ದಾರೆ. ದೊಡ್ಡ ಬಜೆಟ್ ಚಿತ್ರ ವಾಗಿರುವ ಇದು 1000 ಕೋಟಿಗೂ ಹೆಚ್ಚು ಕಲೆಕ್ಷನ್ ಮಾಡಿದೆ ಎನ್ನಲಾಗಿದೆ. ಇದರ ನಡುವೆ ಈ ಚಿತ್ರದ ಎರಡನೇ ಭಾಗದ ಕಥೆಯ ಚರ್ಚ ನಡೆಯುತ್ತಿದೆ ಎಂದು ನಿರ್ದೇಶಕ ರಾಜಮೌಳಿ ತಿಳಿಸಿದ್ದಾರೆ. ಈ ಸಿನಿಮಾವನ್ನು ಡಿಸ್ನಿ + ಹಾಟ್‌ಸ್ಟಾರ್‌ ನಲ್ಲಿ ವೀಕ್ಷಿಸಬಹುದು.

ಪುಷ್ಪಾ: ದಿ ರೈಸ್

ಪುಷ್ಪಾ: ದಿ ರೈಸ್ ತೆಲುಗು ಸಿನಿಮಾವಾಗಿದ್ದು, ಅಲ್ಲು ಅರ್ಜುನ್ ಮತ್ತು ರಶ್ಮಿಕಾ ಮಂದಣ್ಣ ಮುಖ್ಯ ಪಾತ್ರದಲ್ಲಿ ನಟಿಸಿದ್ದಾರೆ. ಈ ಚಿತ್ರದಲ್ಲಿ ಗಂಧದ ಮರ ಕಳ್ಳತನದ ಕಥೆ ಆಧಾರಿತವಾಗಿದೆ.

ವಿಕ್ರಮ್

ಲೋಕೇಶ್ ಕನಕರಾಜ್ ನಿರ್ದೇಶನದ ಹಾಗೂ ಕಮಲ್ ಹಾಸನ್ ಅಭಿನಯದ ವಿಕ್ರಮ್ ಸಿನಿಮಾ ಬಗ್ಗೆ ಗೂಗಲ್‌ ನಲ್ಲಿ ಹೆಚ್ಚು ಹುಡುಕಲಾಗಿದೆ. ವಿಷಯ ಏನೆಂದರೆ ಈ ವರ್ಷ ಹಲವು ತಮಿಳು ಸಿನಿಮಾಗಳು ಬಿಡುಗಡೆಯಾಗಿದ್ದರೂ, ಗೂಗಲ್‌ನಲ್ಲಿ ಅತಿ ಹೆಚ್ಚು ಹುಡುಕಿದ ತಮಿಳು ಸಿನಿಮಾಗಳಲ್ಲಿ ವಿಕ್ರಮ್ ಒಂದೇ ಆಗಿದೆ.

ಥಾರ್: ಲವ್ ಮತ್ತು ಥಂಡರ್

ಥಾರ್: ಲವ್ ಮತ್ತು ಥಂಡರ್ ಸಿನಿಮಾವನ್ನೂ ಸಹ ಗೂಗಲ್‌ ನಲ್ಲಿ ಹೆಚ್ಚಾಗಿ ಸರ್ಚ್‌ ಮಾಡಲಾಗಿದೆ. ಮಾರ್ವೆಲ್ ಸಿರೀಸ್ ನಲ್ಲಿ ತೆರೆಕಂಡ ಈ ಚಿತ್ರಕ್ಕೆ ವಿಶ್ವದಾದ್ಯಂತ ಉತ್ತಮ ಪ್ರತಿಕ್ರಿಯೆ ವ್ಯಕ್ತವಾಗಿದೆ. ಹಾಗೆಯೇ ಈ ಸಿನಿಮಾ ಭಾರತೀಯ ಅಭಿಮಾನಿಗಳನ್ನೂ ಸೆಳೆದಿದೆ.

ಕಾಂತಾರ

ಕಡಿಮೆ ಬಜೆಟ್ ನಲ್ಲಿ ತೆರೆಕಂಡು ದೇಶಾದ್ಯಂತ ಹೆಚ್ಚು ಸದ್ದು ಮಾಡಿದ ಕನ್ನಡದ ಸಿನಿಮಾ ಕಾಂತಾರ. ಹಾಗೆಯೇ ಈ ಸಿನಿಮಾ ಹಲವು ಭಾಷೆಗಳಲ್ಲೂ ಲಾಂಚ್‌ ಆಗಿದೆ. 16 ಕೋಟಿ ವೆಚ್ಚದಲ್ಲಿ ತಯಾರಾದ ಈ ಚಿತ್ರ 400 ಕೋಟಿಗೂ ಹೆಚ್ಚು ಕಲೆಕ್ಷನ್ ಮಾಡಿದೆ. ಸದ್ಯಕ್ಕೆ ಅಮೆಜಾನ್ ಪ್ರೈಮ್‌ನಲ್ಲಿ ಕಾಂತಾರ ಸಿನಿಮಾವನ್ನು ವೀಕ್ಷಿಸಬಹುದು.

ಕೆಜಿಎಫ್: ಅಧ್ಯಾಯ 2

ಕೆಜಿಎಫ್: ಅಧ್ಯಾಯ 2 ಸಿನಿಮಾ ಕನ್ನಡದ ಮತ್ತೊಂದು ಸಿನಿಮಾವಾಗಿದ್ದು, ಇದನ್ನೂ ಸಹ ಗೂಗಲ್‌ ನಲ್ಲಿ ಜನರು ಹೆಚ್ಚಾಗಿ ಸರ್ಚ್‌ ಮಾಡಿದ್ದಾರೆ. ಈ ಸಿನಿಮಾಗೆ ಭಾರತದಾದ್ಯಂತ ಭಾರಿ ಪ್ರತಿಕ್ರಿಯೆ ವ್ಯಕ್ತವಾಗಿದೆ. ಹಾಗೆಯೇ ಈ ಸಿನಿಮಾವನ್ನು ಅಮೆಜಾನ್ ಪ್ರೈಮ್‌ ಓಟಿಟಿ ಸೈಟ್‌ನಲ್ಲಿ ವೀಕ್ಷಿಸಬಹುದು.

ಲಾಲ್ ಸಿಂಗ್ ಚಡ್ಡಾ, ದೃಶ್ಯಂ 2

ಇನ್ನುಳಿದಂತೆ ಲಾಲ್ ಸಿಂಗ್ ಚಡ್ಡಾ, ದೃಶ್ಯಂ 2 ಸಿನಿಮಾಗಳನ್ನು ಸಹ ಗೂಗಲ್‌ನಲ್ಲಿ ಹೆಚ್ಚಾಗಿ ಸರ್ಚ್‌ ಮಾಡಲಾಗಿದೆ. ಅಮೀರ್ ಖಾನ್ ಅಭಿನಯದ ಲಾಲ್ ಸಿಂಗ್ ಚಡ್ಡಾ ಚಿತ್ರವು ಮಿಶ್ರ ವಿಮರ್ಶೆಗಳನ್ನು ಪಡೆಯಿತು ಎಂಬುದು ಗಮನಿಸಬೇಕಾದ ಸಂಗತಿ. ಹಾಗೆಯೇ ದೃಶ್ಯಂ 2 ಮಲಯಾಳಂನಲ್ಲಿ ಮೋಹನ್ ಲಾಲ್, ತಮಿಳಿನಲ್ಲಿ ಕಮಲ್ ಹಾಸನ್ ಮತ್ತು ಹಿಂದಿಯಲ್ಲಿ ಅಜಯ್ ದೇವಗನ್ ಅಭಿನಯಿಸಿದ್ದಾರೆ.