ಸ್ಕಲ್‌ ಬ್ರೇಕರ್‌ ಚಾಲೆಂಜ್‌ ವಿಡಿಯೋ ಡಿಲೀಟ್‌ಗೆ ಸರ್ಕಾರ ಸೂಚನೆ..! ಏನೀದು ಚಾಲೆಂಜ್‌..?

ಈ ಚಾಲೆಂಜ್‌ನಿಂದ ತಲೆಗೆ ಗಂಭೀರ ಗಾಯಗಳು, ಮೂಳೆ ಮುರಿಯುವ ಮತ್ತು ವ್ಯಕ್ತಿಯ ತಲೆಬುರುಡೆಗೆ ಪೆಟ್ಟು ಬೀಳುತ್ತದೆ ಎಂದು ವೈದ್ಯರು ಎಚ್ಚರಿಸಿದ್ದಾರೆ. ಕಳೆದ ವಾರ ನಡೆದ ಸಭೆಯಲ್ಲಿ ಎಲೆಕ್ಟ್ರಾನಿಕ್ಸ್ ಮತ್ತು ಮಾಹಿತಿ ತಂತ್ರಜ್ಞಾನ ಸಚಿವಾಲಯ ಸಾಮಾಜಿಕ ಮಾಧ್ಯಮ ಪ್ಲಾಟ್‌ಫಾರ್ಮ್‌ಗಳಿಗೆ ಅಂತಹ ವಿಡಿಯೋಗಳನ್ನು ತೆಗೆಯುವಂತೆ ಸೂಚನೆ ನೀಡಿದೆ. ಈ ಮೂಲಕ ಅಂತಹ ಕೃತ್ಯಗಳಿಗೆ ಕಡಿವಾಣ ಹಾಕಲು ಮುಂದಾಗಿದೆ.

ಇದು ಅಪಾಯಕಾರಿ ಆಟ, ಅಪ್ರಾಪ್ತ ವಯಸ್ಕರ ಮೇಲೆ ತೀವ್ರ ಪರಿಣಾಮ ಬೀರುತ್ತದೆ. ಸಾರ್ವಜನಿಕ ಸುರಕ್ಷತೆಯ ವಿಷಯವಾಗಿರುವುದರಿಂದ ಸ್ಕಲ್‌ ಬ್ರೇಕ್‌ ಸವಾಲಿನ ವಿಡಿಯೋಗಳನ್ನು ಸಾಮಾಜಿಕ ಮಾಧ್ಯಮ ವೇದಿಕೆಗಳು ತ್ವರಿತವಾಗಿ ತೆಗೆದುಹಾಕಬೇಕು ಎಂದು ಸಚಿವಾಲಯ ಹೇಳಿದೆ.

ಇಂತಹ ಅಪಾಯಕಾರಿ ಕ್ರಮಗಳನ್ನು ನಿಯಂತ್ರಿಸಲು ಆನ್‌ಲೈನ್ ಜಾಗೃತಿ ಅಭಿಯಾನ ಕೈಗೊಳ್ಳುವಂತೆ ಸಾಮಾಜಿಕ ಮಾಧ್ಯಮ ವೇದಿಕೆಗಳನ್ನು ಸಚಿವಾಲಯ ಮನವಿ ಮಾಡಿದೆ. ಇನ್ನು, ಟಿಕ್‌ಟಾಕ್‌ನಲ್ಲಿ ಈ ಚಾಲೆಂಜ್‌ #Skullbreakerchallenge ಎಂಬ ಹ್ಯಾಶ್‌ಟ್ಯಾಗ್‌ನಡಿಯಲ್ಲಿ 4.8 ಮಿಲಿಯನ್ ವೀಕ್ಷಣೆ ಕಂಡಿದೆ.

ಕಂಪನಿಯ ಸಮುದಾಯ ಮಾರ್ಗಸೂಚಿಗಳನ್ನು ಉಲ್ಲಂಘಿಸಿರುವುದರಿಂದ ಟಿಕ್‌ಟಾಕ್‌ ಈ ವಿಡಿಯೋವನ್ನು ತೆಗೆದಿದೆ. ಅದಲ್ಲದೇ, ಅಪಾಯಕಾರಿ ಸಾಹಸಗಳಲ್ಲಿ ಭಾಗವಹಿಸದಂತೆ ಬಳಕೆದಾರರಿಗೆ ಎಚ್ಚರಿಕೆಯನ್ನು ಸಹ ಟಿಕ್‌ಟಾಕ್‌ ನೀಡಿದೆ. ಬಳಕೆದಾರರು ಚಾಲೆಂಜ್‌ ವಿಡಿಯೋಗಳನ್ನು ಹುಡುಕಿದಾಗಲೆಲ್ಲಾ ಈ ಎಚ್ಚರಿಕೆ ಆಪ್‌ನಲ್ಲಿ ಕಾಣಿಸಿಕೊಳ್ಳುತ್ತದೆ.