ಉತ್ತಮ ಫೋಟೋಗಳನ್ನು ತೆಗೆಯಲು ಹೊಂದಿರಬೇಕಾದ ಸ್ಮಾರ್ಟ್ ಫೋನ್ ಕ್ಯಾಮೆರಾ ಆಕ್ಸೆಸರೀಸ್.

ಪಾಕೆಟ್ ಸ್ಪಾಟ್ ಲೈಟ್.

ಬಹಳಷ್ಟು ಜನರಿಗೆ ಪಾಕೆಟ್ ಸ್ಪಾಟ್ ಲೈಟ್ ಬಗ್ಗೆ ಗೊತ್ತಿರುವುದಿಲ್ಲ. ಪಾಕೆಟ್ ಸ್ಪಾಟ್ ಲೈಟ್ ಅನ್ನು ಉಪಯೋಗಿಸಿಕೊಂಡು ನೀವು ಕಡಿಮೆ ಬೆಳಕಲ್ಲೂ ಉತ್ತಮ ಚಿತ್ರವನ್ನು ತೆಗೆಯಬಹುದು. ಇದರಲ್ಲಿ ಮೂರು ಹಂತಗಳಲ್ಲಿ ಬೆಳಕನ್ನು ನಿಯಂತ್ರಿಸಬಹುದು. ಒಳಾಂಗಣದ ಚಿತ್ರ ತೆಗೆಯಲು ಉತ್ತಮ ನೆರಳು ಬೆಳಕಿನ ಸಂಯೋಜನೆಯನ್ನು ಸೃಷ್ಟಿಸಲು ಇದು ಸಹಕಾರಿ.

ಪಾಕೆಟ್ ಸ್ಪಾಟ್ ಲೈಟ್ ಹೆಚ್ಚು ಬಾಳಿಕೆ ಬರುತ್ತದೆ ಮತ್ತು ಸಲೀಸಾಗಿ ನಿಮ್ಮ ಜೇಬಿನಲ್ಲಿ ಕೂರುತ್ತದೆ. ಪಾಕೆಟ್ ಸ್ಪಾಟ್ ಲೈಟ್ ಅನ್ನು ನಿಮ್ಮ ಮೊಬೈಲಿನ ಹೆಡ್ ಫೋನ್ ಜ್ಯಾಕಿಗೆ ಹಾಕಿ, ಆನ್ ಮಾಡಿ ಮತ್ತು ನಿರಂತರ ಬೆಳಕಿನ ಸಹಾಯದಿಂದ ಉತ್ತಮ ಗುಣಮಟ್ಟದ ಚಿತ್ರ / ವೀಡಿಯೋಗಳನ್ನು ತೆಗೆಯಿರಿ. ಪಾಕೆಟ್ ಸ್ಪಾಟ್ ಲೈಟ್ ಬ್ಯಾಟರಿ ಜೊತೆಗೆ ಬರುವ ಕಾರಣ ಅದು ನಿಮ್ಮ ಮೊಬೈಲಿನ ಬ್ಯಾಟರಿಯನ್ನು ಉಪಯೋಗಿಸುವುದಿಲ್ಲ. ಯು.ಎಸ್.ಬಿ ಕೇಬಲ್ ಬಳಸಿ ಪಾಕೆಟ್ ಸ್ಪಾಟ್ ಲೈಟ್ ಅನ್ನು ಚಾರ್ಜ್ ಮಾಡಬಹುದು.

ಟ್ರೈಪಾಡ್.

ಟ್ರೈಪಾಡ್ ಅವಶ್ಯಕವೇ? ಉತ್ತಮ ಗುಣಮಟ್ಟದ ಚಿತ್ರ ತೆಗೆಯಲು ಖಂಡಿತ ಅವಶ್ಯಕ. ಫೋಟೋಗ್ರಫಿಯಲ್ಲಿ ಆಸಕ್ತಿಯಿರುವವರು ಟ್ರೈಪಾಡ್ ಹೊಂದುವುದನ್ನು ಮರೆಯಲೇಬಾರದು. ಕೈಲಿಡಿದು ತೆಗೆವ ಚಿತ್ರಗಳು ಬಹಳಷ್ಟು ಬಾರಿ ಅಲುಗಾಟದಿಂದಾಗಿ ಅಸ್ಪಷ್ಟವಾಗಿರುತ್ತದೆ. ಸ್ಮಾರ್ಟ್ ಫೋನನ್ನು ಕೈಲಿಡಿದು ಸೂರ್ಯಾಸ್ತಮಾನದ ಚಿತ್ರ ತೆಗೆಯುವುದು ಉತ್ತಮ ನಿರ್ಧಾರವಲ್ಲ. ಇಂತಹ ಸಂದರ್ಭದಲ್ಲಿ ಟ್ರೈಪಾಡ್ ಅನುಕೂಲಕರ. ನಿಧಾನಗತಿಯ ಶಟರ್ ವೇಗವನ್ನು ಬಳಸಿ ಚಿತ್ರ ತೆಗೆಯಬಹುದು, ಒಂದೇ ಸ್ಥಳದಲ್ಲಿ ಸರಣಿ ಚಿತ್ರಗಳನ್ನು ತೆಗೆದು ಉತ್ತಮ ಫಲಿತಾಂಶವನ್ನು ಪಡೆಯಬಹುದು.

ಸೆಲ್ಫಿ ಸ್ಟಿಕ್.

ಪರಿಸರವನ್ನು ತೆಗೆಯುವುದಕ್ಕಿಂತ ಹೆಚ್ಚಾಗಿ ಜನರೀಗ ಸೆಲ್ಫಿ ತೆಗೆದುಕೊಳ್ಳುವುದರಲ್ಲಿ ನಿರತರು. ಉತ್ತಮ ಸೆಲ್ಫಿ ತೆಗೆಯಲು ಸೆಲ್ಫಿ ಸ್ಟಿಕ್ ಗಳು ಅವಶ್ಯಕ. ಸೆಲ್ಫಿ ಸ್ಟಿಕ್ ಗಳು ಸರಳವಾಗಿವೆ, ಆರಾಮಾಗಿ ಹೊತ್ತೊಯ್ಯಬಹುದು, ಮತ್ತು ಇವು ದುಬಾರಿ ಕೂಡ ಅಲ್ಲ. ಸ್ಮಾರ್ಟ್ ಫೋನ್ ಲೋಕಕ್ಕೆ ಸೆಲ್ಫಿ ಸ್ಟಿಕ್ ಗಳು ಪ್ರವೇಶಿಸಿದ್ದು ತೀರ ಇತ್ತೀಚೆಗೆ, ಸೆಲ್ಫಿ ಹುಚ್ಚಿನಿಂದಾಗಿ ಇದರ ಮಾರುಕಟ್ಟೆ ವ್ಯಾಪಕವಾಗಿಬಿಟ್ಟಿದೆ.

ಸೆಲ್ಫಿ ಸ್ಟಿಕ್ ನಿಂದ ನೀವು ಸೆಲ್ಫಿ ತೆಗೆಯಬಹುದು, ಗ್ರೂಪಿ ತೆಗೆಯಬಹುದು ಅಥವಾ ವಿಭಿನ್ನ ಕೋನದಿಂದ ಚಿತ್ರವನ್ನು ಸೆರೆಹಿಡಿಯಬಹುದು. ಕೆಲವು ಸೆಲ್ಫಿ ಸ್ಟಿಕ್ ಗಳಲ್ಲಿ ಬ್ಲೂಟೂಥ್ ನಿಯಂತ್ರಕಗಳಿವೆ, ಇವೆಲ್ಲವೂ ಜೇಬಿಗೆ ಹೊರೆಯಾಗುವುದಿಲ್ಲ.

ಲೆನ್ಸುಗಳು.

ಹೆಚ್ಚುವರಿ ಲೆನ್ಸುಗಳನ್ನು ಉಪಯೋಗಿಸಿಕೊಂಡು ಉತ್ತಮ ಚಿತ್ರವನ್ನು ನಿಮ್ಮ ಸ್ಮಾರ್ಟ್ ಫೋನಿನಿಂದ ತೆಗೆಯಬಹುದು. ಹಲವಾರು ಕಿರು ಚಿತ್ರಗಳನ್ನು ಮತ್ತು ಡಾಕ್ಯುಮೆಂಟರಿಗಳನ್ನು ಈ ಲೆನ್ಸುಗಳನ್ನು ಉಪಯೋಗಿಸಿ ತೆಗೆಯಲಾಗಿದೆ, ಮತ್ತವುಗಳು ಅತ್ಯಾಕರ್ಷಕವಾಗಿಯೂ ಮೂಡಿ ಬಂದಿದೆ.

ವಿವಿಧ ಗಾತ್ರದ, ವಿವಿಧ ರೂಪದ ಹಲವಾರು ಸ್ಮಾರ್ಟ್ ಫೋನ್ ಕ್ಯಾಮೆರಾ ಲೆನ್ಸುಗಳು ಮಾರುಕಟ್ಟೆಯಲ್ಲಿ ಲಭ್ಯವಿದೆ, ಕೈಗೆಟುಕುವ ದರದಲ್ಲಿ.

ಹೊಸ ಸ್ಮಾರ್ಟ್‌ಫೋನ್‌ಗಳ ಆನ್‌ಲೈನ್ ಡೀಲ್‌ಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ